शाओमीने भारतात आपल्या सर्वात पॉवरफुल फोनची विक्री बंद केली आहे. कंपनी एप्रिलमध्ये देशात आलेला Mi 11 Ultra आता विकणार नाही. हा फोन मर्यादित प्रमाणात उपलब्ध करवण्यात आला होता. त्यामुळे काही दिवसांपूर्वी या फोनचा स्टॉक संपल्यानंतर Xiaomi ने हा फोन पुन्हा न मागवण्याचा निर्णय घेतला आहे, अशी माहिती इंडिया टुडेच्या रिपोर्टमधून समोर आली आहे.
Mi 11 Ultra भारतात बंद करण्याचे कारण
रिपोर्टनुसार, 2022 मध्ये येणाऱ्या फ्लॅगशिप फोन्सवर लक्ष केंद्रित करण्यासाठी कंपनीने हा निर्णय घेतला आहे. तसेच गेले कित्येक दिवस भारतात Mi 11T Pro स्मार्टफोन येणार असल्याच्या बातम्या येत आहेत. हा देखील शाओमीचा फ्लॅगशिप फोन आहे. परंतु हा मी 11अल्ट्रा प्रमाणे अल्ट्रा प्रीमियम स्मार्टफोन नाही. कंपनी Mi 11 Ultra देशात बनवत नव्हती, हा फोन चीनमधून आयात करावा लागत असल्यामुळे या फोनची किंमत देखील जास्त होती. या फोनचे मोठ्या प्रमाणावर कौतुक करण्यात आले होते. इतर स्पेक्स तर फ्लॅगशिप लेव्हल होतेच परंतु Mi 11 Ultra ची खासियत या फोनच्या मागे मिळणारा छोटा सेकंडरी डिस्प्ले ही होती.
आगामी Xiaomi 11T Pro चे स्पेसिफिकेशन्स
Xiaomi 11T Pro या सीरिजमधील पॉवरफुल फोन आहे. स्पेसिफिकेशन्समधून देखील ही पॉवर दिसून येते. कारण या फोनमध्ये क्वॉलकॉमचा शक्तिशाली Snapdragon 888 प्रोसेसर देण्यात आला आहे. हा फोन अँड्रॉइड 11 बेस्ड MIUI 12.5 वर चालतो. शाओमी 11T मध्ये 120Hz रिफ्रेश रेट, 20:9 अस्पेक्ट रेश्यो, 480Hz टच रिस्पॉन्स रेट, डॉल्बी विजन आणि कॉर्निंग गोरिल्ला ग्लास विक्टस लेयरसह 6.67-इंचाचा FHD+ TrueColor डिस्प्ले देण्यात आला आहे. यात 12GB रॅम आणि 256GB पर्यंतची इंटरनल स्टोरेज मिळते आहे.
या फोनची खासियत म्हणजे या फोनचा चार्जिंग स्पीड. Xiaomi 11T Pro मधील 5000mAh ची बॅटरी 120W इतक्या जबरदस्त वेगाने चार्ज करता येते. हा फोन फक्त 17 मिनिटांत फुलचार्ज होऊ शकतो. बेस मॉडेलप्रमाणे या फोन मध्ये देखील ट्रिपल रियर कॅमेरा सेटअप आहे. यात 108MP चा सॅमसंग HM2 मुख्य सेन्सर, 8MP ची 119-डिग्री अल्ट्रा-वाईड-अँगल लेन्स आणि 3x झूमसह 8MP टेलीमॅक्रो सेन्सर आहे. हा 16MP च्या फ्रंट कॅमेऱ्याला सपोर्ट करतो.