राज्यावरील अवकाळी पावसाचे ढग सरले

त�

��पमानात किंचीत घट

पुणे : गेल्या पाच-सहा दिवसांपासून राज्यावर घोंगावणारे अवकाळी पावसाचे ढग आज सरले. राज्यातील ढगाळ हवामान गायब होताच काही भागांच्या तापमानात थोडी घट झाली. विदर्भ, मराठवाडयातील काही भागांचे तापमान सरासरीच्या खाली गेले होते. राज्यात सर्वात कमी १०.४ अंश सेल्सिअस तापमान नाशिकमध्ये नोंदविले गेले.
बंगालच्या उपसागरात निर्माण झालेल्या हवेच्या कमी दाबाच्या पट्टयामुळे राज्यात अवकाळी पाऊस पडला होता. विदर्भ आणि मध्य महाराष्ट्राच्या काही भागांमध्ये वादळी वार्‍यासह गारपीटही झाली होती. त्यामुळे राज्यातून थंडी गायब झाली होती. कमाल आणि किमान तापमानात मोठी वाढ झाल्याने उकाडा जाणवत होता. काल बंगालच्या उपसागरातील हवेचा कमी दाबाचा पट्टा विरल्याने राज्यावरील अवकाळी पावसाचे सावट दूर झाले. ढगाळ हवामान सरताच तापमानात घट होण्यास सुरूवात झाली.
पुढील ४८ तास राज्याचे हवामान कोरडे राहण्याची शक्यता भारतीय हवामानशास्त्र विभागाने वर्तविली आहे. त्यामुळे तापमानात आणखी घट होण्याचा अंदाज आहे.
दरम्यान, आज पुण्याचे किमान तापमान स्थिर होते मात्र कमाल तापमानात मोठी वाढ झाली. दिवसाचे तापमान ३३ अंश तर रात्रीचे तापमान १२.५ अंश सेल्सिअस नोंदविले गेले. आज दिवसाचे तापमान वाढल्याने उकाडा जाणवत होता. पुढील २४ तासात शहराच्या तापमानात थोडी घट होण्याची शक्यता पुणे वेधशाळेने वर्तविली आहे.
प्रमुख शहरांमधील किमान तापमान पुढीलप्रमाणे (अंश सेल्सिअसमध्ये) : पुणे १२.५, अहमदनगर १३.१, जळगाव १२.२, कोल्हापूर १७, महाबळेश्वर १५, मालेगाव १३.४, नाशिक १०.४, सांगली १६.७, सातारा १३.९, सोलापूर १८.१, मुंबई २०.८, अलिबाग १७.६, रत्नागिरी १७.१, डहाणू १५.९, भिरा १३, उस्मानाबाद १४.९, औरंगाबाद १३.४, परभणी १५.५, नांदेड १४, बीड १५, अकोला १३.२, अमरावती १४.२, बुलडाणा १४.२, ब्रम्हपूरी १४.१, चंद्रपूर १४.६, नागपूर १२.२, वाशिम १९.८, वर्धा १३.२, यवतमाळ १२.२.