आजकाल कार्पोरेट क्षेत्रात नोकरी सोडण्याची एवढी घाई असते, तितकीच घाई कंपन्यांना देखील त्या कर्मचाऱ्याला जाऊ देण्याची असते. याला ऑफिसमधील वातावरण, नियम आणि समोरच्या कंपनीने दिलेली ऑफर अशा अनेक गोष्टी कारणीभूत असतात. पण सर्वच कंपन्या वाईट नसतात. काही कंपन्या आपल्या चांगल्या कर्मचाऱ्यांना थांबविण्याचा प्रयत्नही करतात. काही जण यात यशस्वी होतात काही नाही. अशीच एक गुगल आहे, जिने नोकरी सोडून जाऊ नये म्हणून पगाराव्यतिरिक्त ८५० कोटी रुपये एका भारतीयाला देऊ केले होते. हा भारतीय आजही गुगलमध्ये एका बड्या पदावर कार्यरत आहे.
गोष्ट आहे युट्यूबच्या सीईओंची. नील मोहन काही वर्षांपूर्वी गुगलची नोकरी सोडून ट्विटर जॉईन करणार होते. नील मोहन हे गुगलसाठी खूप महत्वाचे होते. कंपनीने मागचा पुढचा विचार न करता त्यांच्यासमोर खजिनाच रिता केला. नील यांना रोखण्यासाठी कंपनीने तब्बल १० कोटी डॉलर्स म्हणजेच ८५० कोटी रुपये देऊ केले. हे नील मोहन सध्या युट्यूबचे सीईओ आहेत. त्यांच्या स्टॅटेजीने गुगल दिवसाला करोडो रुपये कमवत आहे. गुगलच्या या ऑफरबाबत मोहन यांनी पीपल बाय WTF पॉडकास्टमध्ये याचा खुलासा केला आहे.
२०११ मधील ही ऑफर आहे. नील मोहन गुगलमध्ये मोठ्या पदावर असताना तेव्हा जाहिरात विभागाचे नेतृत्व करत होते. ट्विटरने त्यांना चीफ प्रोडक्ट ऑफिसरची नोकरी ऑफर केली होती. त्यांना रोखण्यासाठी गुगलने मोठा पैसा मोजला होता. नील मोहन यांना सुमारे ८५० कोटी रुपयांचे स्टॉक युनिट्स देऊ केले. एवढी मोठी ऑफर पाहून नील यांनी गुगलमध्येच राहण्याचा निर्णय घेतला. तो त्यांच्या फायद्याचाही ठरला. आज संपूर्ण जग त्यांना युट्यूबचे सीईओ म्हणून ओळखते.