सोलापूर/ कुसळंब : कंदुरीचा कार्यक्रम आटोपून एका मोटारसायकलवरून तिघेजण गावी परतत असताना अज्ञात वाहनाने जोरदार धडक बसली. त्या अपघातात उपचारापूर्वीच दोघे ठार झाले. तर एक जण गंभीर जखमी झाला आहे. जखमी तरुणावर धाराशिव सिव्हिल हॉस्पिटलमध्ये उपचार चालू आहेत. ही घटना गुरुवारी रात्री बार्शी-धाराशिव रस्त्यावर नारी (ता.बार्शी) शिवारात घडली आहे.
श्रीकांत मधुकर पोंदे (वय ३१) ज्ञानेश्वर शंकर देवकर (वय ४५, रा. दोघे तुळजापूर नाका, पापनस नगर धाराशिव) असे मरण पावलेल्या तरुणांची नावे आहेत. तर फिरोज रब्बानी सय्यद (रा.खाजानगर, धाराशिव) यांच्यावर सिव्हिल हॉस्पिटल धाराशिव येथे उपचार चालू आहे. याबाबत उमाकांत मधुकर पोंदे (वय २९ रा.धारशिव) यांनी पांगरी पोलीसात फिर्याद दिली आहे.
धाराशिव येथील महादेव हरिश्चंद्र जाधव यांचा बार्शी येथे कंदुरीचा कार्यक्रम होता. श्रीकांत पोंदे, ज्ञानेश्वर देवकर व फिरोज सय्यद हे तिघेजण मोटारसायकलवरून (एमएच २५ ए.जी.७८६३) बार्शी येथील कार्यक्रम ओटापून धाराशिवकडे जात असताना नारी शिवारात अज्ञात वाहनाने मोटारसायकलला जोरदार धडक दिली. त्यात तिघेही जमिनीवर कोसळून पडले. श्रीकांत पोंदे व ज्ञानेश्वर देवकर यांच्या डोक्यास मार लागला. बेशुद्ध पडून रक्तप्रवाह वाहत होता. त्यात त्यांचा मृत्यू झाला. अज्ञात वाहन चालकावर पांगरी पोलिसात गुन्हा दाखल झाला आहे.