टॉवेल-चादरींच्या किमतीत प्रतिकिलो दहा रुपयांची वाढ

लोकमत न्यूज नेटवर्क

सोलापूर : टॉवेल आणि चादरीला लागणारा मुख्य कच्चा माल अर्थात सुताच्या दरात सतत वाढ होत असल्याने सोलापुरातील यंत्रमागधारकांनी टॉवेल आणि चादरींच्या किमतीत प्रतिकिलो दहा रुपयांची वाढ करण्याचा निर्णय घेतला आहे. यंत्रमागधारकांच्या बैठकीत दरवाढीचा निर्णय झाला.

सध्या चादरींच्या किमती प्रतिकिलो १६० ते ३५० रुपयांपर्यंत आहेत. तसेच टॉवेलचे दर प्रतिकिलो २५० ते ४०० रुपये इतके आहे. गुणवत्तेनुसार टॉवेल आणि चादरींचे दर ठरतात. आता या दरात दहा रुपयांची वाढ निश्चित झाली आहे.

सर्व प्रकारच्या सुताच्या दरांत १५ ते २० टक्के वाढ झाली आहे. सूत खरेदी केल्याशिवाय यंत्रमाग कारखाने सुरू करता येत नाहीत. या वाढीमुळे उत्पादन खर्चात वाढ झाली. शिवाय गुंतवणुकीतही वाढ होत आहे. त्यामुळे दरवाढही अनिवार्य असल्याची माहिती येथील उद्योजकांनी दिली आहे.

...............

कोट

उद्योगासमोर अनेक संकटे

कोरोना महामारीचा फटका येथील यंत्रमागधारकांना मोठ्या प्रमाणात बसला आहे. लॉकडाऊनच्या काळात उद्योजकांना भरमसाठ वीज बिले आली आहेत. विजेच्या दरातदेखील वाढ झाली आहे. विकलेल्या मालाचे पैसे अद्याप येणे बाकी आहे. बाजारात मोठी थकबाकी आहे. अशात सुताच्या दरात सतत वाढ होत आहे. त्यामुळे टॉवेल आणि चादरींच्या किमतीत वाढ करणे अनिवार्य झाले आहे.

- पेंटप्पा गड्डम

अध्यक्ष, सोलापूर जिल्हा यंत्रमागधारक संघ, सोलापूर

.......