तिकीट दरवाढीच्या विरोधात रेल रोको

शहर-जिल्हा काँग्रेस : चेन्नई एक्स्प्रेस अडवली

सोलापूर : केंद्र शासनाने रेल्वे तिकिटात दरवाढ केल्याच्या निषेधार्थ शहर-जिल्हा काँग्रेसच्या वतीने रेल्वे स्टेशनवर रेल रोको आंदोलन करण्यात आले. कार्यकर्त्यांनी चेन्नई एक्स्प्रेस अडवून जोरदार घोषणाबाजी केली.
रेल्वे मंत्रालयाने दोन दिवसांपूर्वी १४.५ टक्के तिकीट दरवाढ केली. मालवाहतुकीच्या दरात ६ टक्के दरवाढ झाली आहे. वाढत्या महागाईत तिकीट दरवाढीमुळे सर्वसामान्य नागरिकांना मोठा फटका बसत असल्यामुळे शहर-जिल्हा काँग्रेसच्या वतीने बुधवारी सकाळी ११ वा. सोलापूर रेल्वेस्थानकावर चेन्नई एक्स्प्रेस अडवण्यात आली. केंद्र शासनाचा धिक्कार करीत जोरदार घोषणाबाजी करण्यात आली. त्यानंतर विजापूर पॅसेंजर गाडीसमोरही जोरदार घोषणाबाजी करीत कार्यकर्त्यांनी थोड्यावेळासाठी रेल रोको आंदोलन केले.
शहराध्यक्ष प्रकाश यलगुलवार यांच्या मार्गदर्शनाखाली करण्यात आलेल्या या आंदोलनाप्रसंगी जिल्हाध्यक्ष बाळासाहेब शेळके, शहर महिलाध्यक्ष ज्योती वाघमारे, नगरसेविका सुशीला आबुटे, श्रीदेवी फुलारी, जगदेवी नवले, सुभाष चव्हाण, सुमन जाधव, इ ब्लॉक अध्यक्षा संध्या काळे, प्रा. संघमित्रा चौधरी, नंदा कानडे, अरुणा बेंजरपे, सातलिंग शटगार, आजमल शेख, फिरोज कामतीकर, जावेद कांबळे, रामचंद्र कुलकर्णी, एन.एस.यु.आय. शहराध्यक्ष गणेश डोंगरे आदी कार्यकर्ते, पदाधिकारी मोठ्या संख्येने उपस्थित होते.
अच्छे दिन आयेंगे अशा वल्गना करीत भारतीय जनता पार्टीने केंद्रात सत्ता मिळवली; मात्र पहिल्याच महिन्यात सर्वसामान्यांना धक्का देणारी भाडेवाढ करून ठेवली आहे. दिलेली आश्वासने तर लांबच उलट जनतेला वेठीस धरण्याचे धोरण केंद्र शासनाने अवलंबले आहे. शासनाने दरवाढीचा निर्णय मागे न घेतल्यास याहीपेक्षा तीव्र आंदोलन घेऊ आणि रस्त्यावर उतरू असा इशारा यावेळी बोलताना शहराध्यक्ष प्रकाश यलगुलवार यांनी दिला.
-----------------------------
प्रवाशांना पाणी वाटप...
आंदोलनादरम्यान प्रवाशांना कोणत्याही प्रकारचा त्रास होऊ नये यासाठी पिण्याच्या पाण्याचे पाऊच वाटप करण्यात आले. सनदशीर मार्गाने करण्यात आलेल्या आंदोलनात गोंधळ उडणार नाही याची काळजी घेण्यात आली होती.
-------------------------
नगरसेविका पडल्या...
रेल रोको करण्यासाठी सर्व पदाधिकारी, नगरसेवक, नगरसेविका आणि कार्यकर्ते रेल्वे रुळावर उतरले होते. हे आंदोलन सुरू असताना अचानक रुळावर नगरसेविका सुशीला आबुटे या पाय घसरुन पडल्या आणि त्यांना मार लागला.