वैराग नगरपंचायतीसाठी शासकीय स्तरावर हालचालींना वेग

वैराग : जिल्ह्यातील सर्वांत मोठ्या असणाऱ्या वैराग ग्रामपंचायतीचे नगरपंचायतीमध्ये रूपांतर करण्यासाठी राज्य शासनाच्या नगरविकास विभागाने सोलापूरच्या जिल्हा प्रशासनाकडून पत्राद्वारे तत्काळ माहिती मागविली आहे.

सोलापूर जिल्ह्यातील वैराग (ता. बार्शी) ग्रामपंचायतीचे नगरपंचायतीमध्ये रूपांतर करण्याचा प्रस्ताव जिल्हाधिकारी कार्यालयांकडून ७ फेब्रुवारी २०२० रोजी शासनाच्या नगरविकास विभागास पाठविण्यात आला होता. त्यावरून वैराग ग्रामपंचायतीचे नगरपंचायतीमध्ये रूपांतर करण्यासाठी मंत्रालय स्तरावर वेगाने हालचाली सुरू झाल्या आहेत.

नगरविकास विभागाकडून आलेल्या पत्रात पाठवलेल्या प्रस्तावाचे अवलोकन करून प्रस्तावासोबत अनुसूची-अ मध्ये प्रस्तावित नगरपंचायतीमध्ये समाविष्ट करण्याचे क्षेत्र, सर्व्हे क्रमांकाची यादी व अनुसूची-ब संक्रमणात्मक क्षेत्रातील स्थानिक क्षेत्राच्या हद्दीचा तपशील याबाबतची सविस्तर माहिती सोलापूर जिल्हा प्रशासनाने शासनास तत्काळ सादर करावी, असे पत्रात म्हटले आहे. यावरून जिल्हाधिकाऱ्यांनी वैराग ग्रामपंचायतीला संबंधित कागदपत्रांची तत्काळ पूर्तता करण्याचा आदेश दिला आहे.

तत्पुर्वी राष्ट्वादीचे नेते निरंजन भुमकर यांनी माजी ग्रामविकास विभागाकडे २६ जानेवारी २०१९ रोजी वैराग ग्रामपंचायतीचे नगरपंचायतमध्ये रूपांतर करण्याची विनंती केली होती. दरम्यान राज्यातील सत्तातरानंतर राष्ट्रवादीचे मुख शरद पवार, उपमुखमंत्री अजित पवार, पालकमंत्री भरणे यांच्याकडे पाठपुरावा केला होता. त्यामुळेच शासनस्तरावर वैराग ग्रामपंचायतचे नगरपंचायतमध्ये रूपांतर होण्याच्या हालचाली सुरू झाल्या असल्याचे निरंजन भुमकर यांनी सांगितले.

----