सोलापूर : येथील संघ परिवार व समविचारी संघटनांतर्फे नागरिकत्व सुधारणा व नोंदणी कायद्याच्या समर्थनार्थ अक्कलकोट येथे भव्य पदयात्रा काढण्यात आली होती. या पदयात्रेचा समारोपप्रसंगी खासदार डॉक्टर जयसिद्धेश्वर महास्वामी भाषण करत होते. भाषण झाल्यावर त्यांना चक्कर आली, त्यांना तेथील खासगी दवाखान्यात उपचार करून पुढे सोलापूरला पाठविण्यात आले असून अश्विनी हॉस्पिटलमध्ये त्यांच्यावर उपचार सुरू आहेत. आता त्यांची प्रकृती ठीक असल्याची माहिती स्वीय सहाय्यक श्रीकांत माळगे यांनी दिली.
याबाबत सविस्तर माहिती अशी की, अक्कलकोट येथे श्रीमंत कमलाराजे चौक चौकातील प्रियदर्शनी संस्कृती भवन येथे छत्रपती शिवाजी महाराजांच्या पुतळ्यास पुष्पहार अर्पण करून नागरिकत्व कायद्याच्या समर्थनार्थ रॅलीचा शुभारंभ करण्यात आला होता. ही रॅली अक्कलकोट शहरातील प्रमुख मार्गावरून काढण्यात आली. रॅलीनंतर प्रियदर्शनी सांस्कृतिक भवनात आयोजित कार्यक्रमात खासदार जयसिद्धेश्वर महास्वामी बोलत होते . यावेळी अचानक त्यांना भोवळ आल्याने ते स्टेजवरच कोसळले. यानंतर तातडीने त्यांना जवळच्या रुग्णालयात उपचार करून पुढील उपचारासाठी सोलापूर येथील अश्विनी रुग्णालयात दाखल करण्यात आले आहे.