साेलापूर : देशाचे पंतप्रधान नरेंद्र माेदी यांची आज सोलापुरातील होम मैदानावर दुपारी बारा वाजण्याच्या सुमारास सभा होणार आहे. सोलापूर लोकसभा मतदारसंघातील भाजपचे उमेदवार राम सातपुते यांच्या प्रचारार्थ मोदी यांची सभा होत आहे. नरेंद्र मोदी यांच्यासोबतच या या सभेसाठी उपमुख्यमंत्री देवेंद्र फडणवीस यांच्यासह भाजपचे दिग्गज नेत्यांचीही उपस्थिती असणार आहे.
पंतप्रधान नरेंद्र माेदी यांचा साेलापूर दाैरा सुमारे सव्वा तासाचा आहे. हाेम मैदानावर दुपारी १२ वाजता भाजपचे प्रमुख नेते हाेम मैदानावर दाखल हाेतील. माेदींचे हेलिकाॅप्टर हाेटगी राेड विमानतळावर उतरणार आहे. विमानतळ, सात रस्ता, रंगभवन मार्गे ते हाेम मैदानावर दाखल हाेतील. हा मार्ग माेदींचा दाैरा पूर्ण हाेईपर्यंत बंद राहणार आहे. माेदींचे भाषण सुमारे ४५ मिनिटांचे असेल. देवेंद्र फडणवीस, भाजपचे प्रदेशाध्यक्ष चंद्रशेखर बावनकुळे, पालकमंत्री चंद्रकांत पाटील, आमदार श्रीकांत भारतीय, गुलाबराव पाटील यांच्यासह इतर नेते मंचावर असतील असेही भाजपाने सांगितले.
दरम्यान, सभेच्या अनुषंगाने सोलापूर शहरात सर्वत्र पोलिसांचा मोठा बंदोबस्त तैनात करण्यात आला आहे. याशिवाय विमानतळ ते होम मैदान या मार्गावरील वाहतूक काहीकाळासाठी बदंद ठेवण्यात येणार आहे. रस्त्याच्या दुर्तफा जागोजागी पोलिस व वाहतूक पोलिस तैनात करण्यात आले आहेत. आज सकाळपासूनच सरस्वती चौकमार्गे सिध्देश्वर मंदिराकडे येणारा, डफरीन चौक ते हाेम मैदान, रंगभवन ते होम मैदान, लक्ष्मी मार्केट ते होम मैदान यासह आदी सभास्थळाकडे येणारे महत्वाचे मार्ग बंद करण्यात आले आहेत.