पंढरपूर : पंढरपूर येथील स्मशानभूमी शेजारील हॉलमध्ये तीन मित्रांची मटणाची पार्टी सुरु होती. या पार्टीदरम्यान अचानक आलेल्या इतर दोघांना जेवायला न दिल्यामुळे त्यांनी मित्राच्या गळ्यावर चाकूने वार केल्याची घटना शुक्रवारी दुपारी चार वाजता घडली आहे.
पोलिसांकडून मिळालेल्या माहितीनुसार, समाधान सुरेश गायकवाड (वय २९, रा. संतपेठ, महात्माफुले चौक, पंढरपुर), भारत व बाळा हे तिघेजण स्मशानभूमी शेजारील हॉलमध्ये मटणाची पार्टी करत होती. यावेळी त्या ठिकाणी दादा कदम व किशोर दिलीप बंदपट्टे (दोघे रा. पंढरपुर) हे दोघे आले. आम्हाला जेवण द्या म्हणून मारहाण करू लागले.
या दरम्यान दादा कदम याने समाधान गायकवाड यांच्या गळ्यावर व मानेवर चाकूने वार केला. तर किशोर बंदपट्टे यांनी लाकडाने मारहाण केली.
यामुळे सपोनि कपिल सोनकांबळे यांनी दादा कदम व किशोर दिलीप बंदपट्टे यांना ताब्यात घेतले. त्या दोघांना शनिवारी न्यायालयात हजर केले. यावेळी न्यायाधीशांनी त्या दोघांना पाच दिवसांची पोलिस कोठडी सुनावली असल्याची माहिती पोलिस निरीक्षक अरुण पवार यांनी दिली आहे.