आमदार परिचारकांना पाकिस्तानला पाठवा, माजी सैनिकांचे आंदोलन

पंढरपूर, दि. 20 - भारतीय जवानांविरोधात अपशब्द वापरणा-या आमदार प्रशांत परिचारकांविरोधात माजी सैनिकांकडून निषेध आंदोलन करण्यात आले. यावेळी मुर्दाबाद आणि परिचारकांना पाकिस्तानला पाठवा अशा घोषणा देण्यात आल्या. 

पंढरपूर तालुक्यातील भोसे येथे जिल्हा परिषद व पंचायत समितीच्या निवडणूक प्रचारसभेमध्ये बोलताना विधान परिषदेचे आमदार प्रशांत परिचारक यांनी भारतीय सैनिकांच्या जवानांविषयी अपशब्द वापरले. 

‘वर्षभर सैनिक गावाकडे नसतो, तो सीमेवर पेढे वाटतो आणि सांगतो काय झाले तर, मला मुलगा झाला’’ असे वक्तव्य त्यांनी केले होते. देशाच्या सैनिकांबद्दल व त्यांच्या पत्नींबद्दल असं वक्तव्य करणारा देशद्रोहीच असू शकतो. जर सैनिकांचे मनोबल व्यवस्थित असेल तरच देश सुरक्षित राहू शकतो या गोष्टींचा विचार न करता राजकारणाची पोळी भाजून घेण्यासाठी सैनिकांचा वापर केला जातो. अशा व्यक्तीवर देशद्रोहाचा गुन्हा दाखल करावा. त्यांच्या आमदारकीचा व इतर सर्व पदांचा राजीनामा घ्यावा अशी मागणी पंढरपूर तालुक्यातील माजी सैनिक आणि त्यांचे कुटुंबीय करत आहेत.