कडक निर्बंधास विरोध; व्यापाऱ्यांनी ठोठावला जिल्हाधिकाऱ्यांचा दरवाजा

निवेदनात म्हटले आहे की, दोन वर्षांपासून कोरोना विषाणूचा प्रादुर्भाव रोखण्यासाठी शासनाने वेळोवेळी लागू केलेले प्रतिबंध व त्यामुळे अडचणीत आलेल्या व्यावसायिकांची आर्थिक परिस्थिती अधिकच बिकट होणार आहे. व्यवसाय बंद असले तरी बँकांचे हप्ते काही थांबलेले नाहीत. दुकानाचे भाडे, कामगारांचा पगार, लाइट बिल, वैद्यकीय खर्च व घर प्रपंचासाठी लागणारे पैसे हा खर्च काही थांबलेला नाही. यापुढे व्यवसाय बंद ठेवणे शक्य नाही. तसे झाल्यास व्यापाऱ्यांना आत्महत्येशिवाय पर्याय राहणार नाही. जिल्हाधिकाऱ्यांनी कडक निर्बंध न लावता कोरोना संसर्ग रोखण्यासाठीचे नियम पाळून दुकाने उघडी ठेवण्यास परवानगी द्यावी, असे निवेदन व्यापारी महासंघाचे पदाधिकारी गोरख देशमुख, महेश कोठारी, परेश पाटील, मदन शहा आदींनी सोलापूर येथे जाऊन दिले.