माळशिरस : माळशिरस तालुक्यातील घुलेवस्ती येथे दोन मोटारसायकलची समोरासमोर धडक झाली. या अपघातात मोटारसायकलवरील दोन जण ठार झाल्याची घटना आज बुधवार सायंकाळी पाच वाजण्याच्या सुमारास घडली.
सांगवी (ता.फलटण) येथील हणुमंत शंकर बेलदार (वय ४२, रा.सांगवी ता.फलटण जि.सातारा) हे आपल्या बुलेट मोटार सायकल क्र. एम.एच.११ सी.के. २७२७ वरुन जत (जि. सांगली ) कडे निघाले होते. तर माळशिरस येथील रावसाहेब सिद ( वय ४५ ) हे आपल्या शेतातील काम करून खुडूसकडून माळशिरसकडे आपल्या मोटार सायकल क्र एम एच ४५ सी ४९९३ वरून येत होते. पुणे - पंढरपूर पालखी मार्गावर घुलेवस्तीजवळ दोन्ही मोटार सायकलची समोरा सुमोर धडक झाली. ही धडक एवढी जोरात झाली की अपघातात दोन्ही मोटार सायकल चालक जागेवरच ठार झाले. हनुमंत बेलदार हे फलटण एस टी आगारात चालक म्हणून काम करीत होते.