सोलापूर : अक्कलकोट तालुक्यातील कलकर्जाळ येथे एका अज्ञात वाहनात येऊन अनोळखी व्यक्तीने गोळीबार केल्याची घटना बुधवार १४ सप्टेंबर २०२२ रोजी सायंकाळी पाच वाजण्याच्या सुमारास घडली. दरम्यान, गोळीबार करून गाडीतून पळून गेलेल्या आरोपींच्या शोधासाठी मंद्रुप पोलिस ठाण्याचे पोलिस कर्नाटकातील विजयपूरच्या दिशेने रवाना झाले आहेत.
याबाबत पोलिसांकडून प्राथमिक माहिती मिळालेली अशी की, अक्कलकोट तालुक्यातील कलकर्जाळ येथे गोळीबार झाला. ही घटना अक्कलकोट दक्षिण पोलीस ठाण्याच्या हद्दीत घडली. दरम्यान, सोलापूर ग्रामीण पोलिस दलाच्या पोलीस नियंत्रण कक्षातून मंद्रूप पोलीस ठाण्याला याबाबतची माहिती दिली. त्यानंतर गोळीबार करणारा आरोपी काळ्या रंगाच्या स्कार्पिओ गाडीतून पसार झाले असून ती गाडी कर्नाटकच्या दिशेने गाडी गेल्याची माहिती पोलिसांना मिळाली. त्यानंतर मंद्रूप पोलीस ठाण्याचे सहाय्यक पोलीस निरीक्षक रवींद्र मांजरे हे तातडीने आरोपीचा पाठलाग करण्यासाठी विजापूरच्या दिशेने रवाना झाले असून सोलापूर- विजयपूर महामार्गावरील टोल नाके आणि पोलीस स्टेशनला सतर्कतेच्या सूचना सोलापूर ग्रामीण पोलिसांकडून देण्यात आल्या आहेत.
मंद्रूप पोलीस ठाण्याचे सहाय्यक पोलीस निरीक्षक रवींद्र मांजरे यांनी वाहनाचा पाठलाग करीत इंडीच्या जवळ आरोपीला धाडसाने पकडले नियंत्रण कक्षातून माहिती मिळाल्यापासून अवघ्या २७ मिनिटात आरोपीला ताब्यात घेतले. जिल्हा पोलीस प्रमुख तेजस्विनी सातपुते यांचे घटनाक्रमाकडे लक्ष होते.