करमाळ्यात धुळीचं साम्राज्य अन्‌ अस्वच्छता

नगरविकासमंत्री एकनाथ शिंदे, जिल्हाधिकारी मिलिंद शंभरकर, उपजिल्हाधिकारी ज्योती कदम, तहसीलदार समीर माने व मुख्याधिकाऱ्यांना पाठविण्यात आलेल्या निवेदनात म्हटले आहे की, सध्या करमाळा शहरात सर्व प्रभागांत धुळीचे साम्राज्य पसरले आहे. शहराच्या प्रमुख रस्त्याची दुरवस्था झाल्याने मोठ्या प्रमाणात नागरिकांना त्यांचा त्रास होत आहे. रस्त्यावर जागोजागी खड्डे पडले आहेत. संगम चौक ते मुथानगर दरम्याचा रस्ता अत्यंत खराब झालेला आहे. त्याचबरोबर गायकवाड चौक ते दलित स्मशानभूमीपर्यंत रस्ता, महात्मा फुले पुतळा ते सुमंतनगर, छत्रपती शिवाजी महाराज चौक ते देवीचा माळ रोड आदी रस्त्यासह शहरातील रस्ते खराब झाले आहेत. या रस्त्यांची दुरुस्ती करणे गरजेचे आहे. करमाळा शहरातील नगरपालिकेच्या मालकीचे भाडेपट्ट्याने दिलेल्या गाळ्याचे कोरोना काळातील भाडे माफ करणे गरजेचे आहे.

शहराच्या विविध भागांत मोठ्या प्रमाणात चिलारीची झाडे वाढलेली आहेत. जीन मैदानात आठवडा बाजार भरतो. या ठिकाणी स्वच्छतेची गरज आहे. शहरातील गटारी दररोज साफ करुन त्यामध्ये पावडर टाकणे गरजेचे आहे. सार्वजनिक लघुशंकागृहाची संख्या कमी झाल्याने नागरिकांची गैरसोय होत आहे. मार्च २०२० ते जानेवारी २०२१ या कालखंडात कोरोना प्रार्दुभावामुळे शहरातील व्यापार, उद्योगधंद्याचे मोठे नुकसान झाले आहे. यासह अन्य मागण्या नगरपालिका प्रशासनाकडून त्वरित मान्य कराव्यात अन्यथा शिवसेनेकडून तीव्र आंदोलन छेडले जाईल, यांची प्रशासनाने दखल घ्यावी अशी मागणी केली आहे. निवेदनावर उपजिल्हाप्रमुख महेश चिवटे, भरत अवताडे, महिला तालुकाप्रमुख प्रियंका गायकवाड, युवासेना उपजिल्हाप्रमुख मयूर यादव, युवासेना शहरप्रमुख विशाल गायकवाड, शिवसेना उपशहरप्रमुख संतोष गानबोटे, संजय भालेराव, पंकज परदेशी, उमेश पवार, शाखाप्रमुख महमंदअफीस कुरेशी, युवासेना उपशहरप्रमुख अविनाश भिसे, युवासेना उपशहरप्रमुख प्रसाद निंबाळकर यांच्या स्वाक्षऱ्या आहेत.

निवडणुकीच्या तोंडावर श्रेय घेण्याचा प्रयत्न

करमाळा शहरातील अंतर्गत रस्ते तीन वर्षांपूर्वीचे असून, ते कालबाह्य झाले आहेत. रस्त्यासाठी ७ कोटी रुपये मंजूर झाले असून त्याच्या निविदा निघाल्या आहेत. आगामी पालिका निवडणुका डोळ्यासमोर ठेऊन शिवसेना राजकीय श्रेय घेण्याचा प्रयत्न करीत असल्याचा आरोप नगराध्यक्ष वैभवराजे जगताप यांनी केला आहे.

- वैभवराजे जगताप,नगराध्यक्ष करमाळा नगरपरिषद.