दिराचा खून करुन खड्ड्यात गाडला मृतदेह

सांगोला (जि. सोलापूर) : दारू पिऊन सतत त्रास देत असल्याने संतापलेल्या दिराचा स्वत:च्या दोन अल्पवयीन मुलांच्या मदतीने लाकडी काठीने डोक्यात मारहाण करून खून केला. या घटनेची कोठेही वाच्यता होऊ नये व पुरावा नष्ट करण्याच्या हेतूने दिराचा मृतदेह राहत्या पालाच्या घरात खड्डा खोदून गाडला. नाझरे (ता. सांगोला) येथे ही घटना घडली.

आकाश बाबासाहेब शिंदे असे मृताचे नाव आहे. कासाबाई शिंदे (वय ३५) हिच्यासह दोन अल्पवयीन मुलांवर (सर्व रा. नाझरे, ता. सांगोला) सांगोला पोलिसात गुन्हा दाखल झाला आहे.

खानापूर (जि. सांगली) येथील गोसावी समाजातील विकास शिंदे हा ५ ते ७ वर्षापूर्वी मयत झाला आहे. त्याची पत्नी कासाबाई ही दीर आकाश शिंदे याच्यासमवेत त्याच्या तीन मुलांसह राहात होती. आकाश शिंदे हा पोटासाठी भिक्षा मागून उर्वरित वेळेत भंगार वेचून उदरनिर्वाह चालवित होता. आकाश शिंदे भावजय कासाबाईसह तासगाव, खानापूर, आटपाडी, झरे आणि नाझरे (ता. सांगोला) येथे फिरून व्यवसाय करीत त्याच भागात राहात होता.

आकाश शिंदे यास दारूचे व्यसन असल्याने तो कासाबाईस त्रास देत होता. आकाशचे वडील बाबासाहेब शिंदे आल्यानंतर आकाश कोठे गेला आहे, असे विचारले. त्यावेळी कासाबाईने १५ दिवसापूंर्वी भिक्षा मागण्यासाठी गेल्याचे सांगितले. मात्र, सून मंजुषा प्रकाश शिंदे हिने कासाबाई आणि तिच्या दोन मुलांनी आकाशला काठीने मारुन त्याचा खून केल्याचे सांगितले.

ही घटना समजताच वडील बाबासाहेब शिंदे यांनी नातवास सोबत घेऊन खानापूर पोलीस स्थानक गाठले. तेथील पोलिसांनी ही घटना सांगोला पोलीस ठाण्याच्या हद्दीत घडल्याने तेथे तक्रार देण्यास सांगितले. सांगोला पोलिसांनी आकाशच्या मुलाकडे सखोल चौकशी केली असता खुनाची घटना उघडकीस आली. याबाबत, बाबासाहेब पुंडलिक शिंदे (रा. खानापूर, जि. सांगली) यांनी फिर्याद दाखल केली आहे. पोलिसांनी कासाबाई शिंदे हिच्यासह तिची दोन अल्पवयीन मुले या तिघांवर भादंवि कलम ३०२ अन्वये खुनाचा गुन्हा दाखल केला आहे. तपास सहायक पोलीस निरीक्षक माने करीत आहेत.

इन्फो

मुलाच्या सांगण्यावरून फुटले खुनाचे बिंग

आकाश शिंदे याच्या अल्पवयीन मुलाच्या सांगण्यावरून वडिलांच्या खुनाचे बिंग फुटले. विशेष म्हणजे आकाशचा मृतदेह पालाच्या घरात गाडून कासाबाई ही १० ते १२ दिवसांपासून बिनधास्त वावरत होती. खुनी कितीही हुशार असला तरी पाठीमागे पुरावा सोडतोच आणि नेमके आकाश शिंदेच्या बाबतीत हेच घडल्याने तिघांना गजाआड व्हावे लागले.