पंढरपूर : पंढरपूर शहरापासून अवघ्या काही अंतरावर असलेल्या तीन रस्ते येथे भरधाव वेगात निघालेली कार पलटी झाली. या अपघातात पंढरपुरातील प्रसिद्ध उद्योजक महालक्ष्मी फर्निचरचे मालक सागर दोशी यांचा जागीच मृत्यू झाला. मयत सागर दोशी हे कामानिमित्त मित्रांसोबत बाहेरगावी गेले होते़ घरी परतत असताना सोमवारी पहाटेच्या सुमारास हा अपघात झाला.
पंढरपूर येथील महालक्ष्मी मसालेचे मालक अशोक दोशी यांचे सुपुत्र सागर दोशी यांनी नुकतीच महालक्ष्मी फर्निचरच्या व्यवसायात यशस्वी वाटचाल सुरू केली होती. सागर दोशी आणि मित्र परिवार कामानिमित्त बाहेरगावी गेले होते. परतीच्या प्रवासात उशीर झाल्याने ते पंढरपूर- मोहोळ रोडवरील साईराज हॉटेल येथे जेवण्यासाठी थांबले होते. जेवणानंतर परतताना फॉर्च्युनर गाडीवरचा ताबा सुटला आणि गाडी ४ पलट्या घेऊन आदळली. त्यामध्ये सागर दोशी गंभीर जखमी होऊन मृत्यूमुखी पडले. गाडीतील ४ व्यक्ती जखमी असून त्यांच्यावर रूग्णालयात उपचार सुरू आहेत.