सहा लाखांच्या सोनसाखळ्या देऊन सराफाला गंडविले

मोहोळ : ओळखीचा फायदा घेत तांबे व इतर धातू मिक्स करून बनवलेल्या सहा लाख दहा हजारांच्या बनावट सोनसाखळ्या देऊन एका सराफाची फसवणूक केली.

२६ जानेवारी रोजी ही घटना घडली असून, या प्रकरणी मोहोळ पोलिसांनी दोघांविरुद्ध गुन्हा दाखल केला आहे. संबंधितांपैकी एकाला मोहोळ येथील न्यायालयात हजर केले असता ३० जानेवारीपर्यंत पोलीस कोठडी सुनावली.

पोलीस सूत्राकडील माहितीनुसार सोलापूर शहरातील रहिवासी सराफ मारुती रेवणकर यांचे सावळेश्वर (ता. मोहोळ) येथे गंगा ज्वेलर्स नावाने दुकान आहे. सावळेश्वर येथून त्यांच्या दुकानात नेहमी येणारे पप्पू ऊर्फ दावल तांबोळी याने ६ जानेवारी ते १५ जानेवारीदरम्यान लॉकडाऊन काळात आला आणि पैशाची गरज आहे, असे सांगत सोन्याचे कोटींग व होलमार्क असलेल्या ८० गॅम वजनाच्या तीन साखळ्या देऊन दोन लाख साठ हजार रुपये नेले होते. त्यानंतर १२ जुलै रोजी पुन्हा त्याने एकसारख्या दिसणाऱ्या चार चेन आणल्या. त्याच्या बदल्यात त्यास साडेतीन लाख रुपये दिले. त्यानंतर त्या सराफास संशय आल्याने त्या सर्व चेन सोलापूर येथील सराफांकडे तपासल्या असता त्या बोगस असल्याचे आढळून आले. त्यानंतर त्या सोनाराने पप्पू तांबोळी यास विचारले असता त्याने उडवाउडवीची उत्तरे देत धमकावत पैसे परत आणून देतो म्हणाला आणि तीन चेन घेऊन गेला.

दरम्यान, २६ जानेवारी रोजी इस्माईल युन्नूस मन्यार हा त्या सराफाकडे १० ग्रॅमची चेन व ५ ग्रॅमची चेन घेऊन आला. त्यावर गहाण ठेवून पैसे मागू लागला. त्यावेळी त्या सराफाच्या लक्षात आले की, आपली फसवणूक होत आहे. त्यांनी मोहोळ पोलिसांशी संपर्क साधला. पोलिसांनी त्यातील एकास तत्काळ ताब्यात घेतले. यावेळी त्याच्याकडे चौकशी केली असता मोहोळच्या एका बँकेत दहा तोळे सोने ठेवले असून, त्याच्या टोळीतील साथीदारांनी जिल्ह्यात इतर ठिकाणी ही फसवणूक केली असल्याची कबुली दिली आहे.

याबाबत दोघांवर फसवणुकीचा गुन्हा दाखल करून एकास अटक करून न्यायालयात उभे केले असता त्यास ३० जानेवारीपर्यंत पोलीस कोठडीत ठेवण्याचे आदेश दिले. अधिक तपास पोलीस उपनिरीक्षक संतोष इंगळे करीत आहेत.