सोलापूर : बार्शी-धाराशिव मार्गावर रस्त्याच्या मध्यभागी उभा असलेल्या उसाच्या ट्राॅलीला पाठीमागून दुचाकीची जोरदार धडक बसली. या अपघातात दुचाकीवरील एकाचा गंभीर जखमी होऊन उपचारापूर्वीच मृत्यू झाला, तर एकजण जखमी झाला आहे. ही घटना २४ डिसेंबर रोजी सकाळी बार्शी-धाराशिव रस्त्यावर तांदूळवाडी (ता. बार्शी) येथून ७०० मीटर अंतरावर घडली.
तीन दिवसांपूर्वीच (ता. २१) याच परिसरात बस-दुचाकी अपघातात तीन तरुणांचा जागीच मृत्यू झाल्याची घटना ताजी असताना ही दुसरी घटना घडल्याचे हळहळ व्यक्त होत आहे. अमीर मुबारक सय्यद (वय २८, रा. ख्याजानगर, बार्शी) असे मृत्यू झालेल्या तरुणाचे नाव आहे. सोहेल शकील खान (वय २०, बार्शी) जखमी झालेल्या तरुणाचे नाव आहे. याबाबत फिर्यादीत म्हटले आहे की, अमीर मुबारक सय्यद व सोहेल शकील खान हे दोघे धाराशिव येथील मामाकडे मुक्कामी थांबून सकाळी पाच वाजता दुचाकीवरून (क्रमांक एमएच १३-ईजी ७०३३) बार्शीकडे जात होते. तांदूळवाडीपासून ७०० मीटर अंतरावर आले असता, रस्त्याच्या मध्यभागी उसाने भरलेल्या ट्रॅक्टरच्या (क्रमांक एमएच १३-एजे ५९६१) पाठीमागील ट्रॉलीला पाठीमागून त्यांच्या दुचाकीची जोरदार धडक बसली. त्यात अमीर सय्यद गंभीर जखमी झाल्याने १०८ च्या रुग्णवाहिकेने पांगरी ग्रामीण रुग्णालयात दाखल केले असता, मृत्यू झाल्याचे घोषित करण्यात आले. याबाबत तपास पोहेकाॅ शब्बीर शेख करीत आहेत.