सोशल मीडियावर अनेकदा डिलिव्हरी बॉयशी संबंधित काही व्हिडीओ व्हायरल होत असताना आपण पाहिले असतील. पण आता समोर आलेला व्हिडीओ पाहून लोक खूप मजा घेत आहेत आणि काहीजण नाराजही आहेत. झोमेटोचा एक डिलिव्हरी बॉय फूड डिलिव्हरी करण्याऐवजी भर रस्त्यात थांबतो आणि इन्स्टा रील बनवण्यासाठी नाचू लागतो. आता ही व्हायरल क्लिप पाहिल्यानंतर लोक म्हणू लागलेत की डिलिव्हरी उशीरा येण्याची ही कारणं आहेत तर.
व्हायरल होत असलेल्या व्हिडिओमध्ये झोमेटोच्या गणवेशातील डिलिव्हरी बॉय रस्त्यात नाचताना पाहू शकता. व्हिडिओतील डिलिव्हरी बॉयच्या डान्स मूव्ह्स पाहण्यासारख्या आहेत. मात्र, त्याची रील बनवण्याची ही पद्धत काहींना पसंत न पडल्यानं अनेकांनी टीकाही केली आहे. आता हा व्हिडिओ शेअर करून लोक झोमेटोच्या ऑर्डर उशिरा का पोहोचतात याची कारणं समोर येऊ लागली आहेत, अशा प्रतिक्रिया देत आहेत. व्हायरल क्लिपमध्ये दिसतं की, डिलिव्हरी बॉय स्कूटीवरून उतरतो, नंतर अचानक डान्स करू लागतो. आता या व्हिडिओवर लोक वेगवेगळ्या पद्धतीने प्रतिक्रिया देत आहेत.
लोकांना वाटेल की डिलिव्हरी बॉय ट्रॅफिकमध्ये अडकल्यामुळे उशीर होत असावा. पण इथे काहीतरी वेगळंच चाललंय, असं एका यूझरनं म्हटलं आहे. ही ३१ सेकंदांची क्लिप पाहताच ट्विटरवर व्हायरल झाली आहे. काहींना हा व्हिडिओ खूपच मजेशीर वाटला, तर काही युझर्सनं या कृत्याबद्दल संताप व्यक्त केला आहे. ग्राहकानं ऑर्डर केलेलं जेवण थंड होत आहे आणि हा माणूस नाचण्यात व्यस्त आहे, असं एका यूझरनं म्हटलं आहे. तर त्याचवेळी दुसऱ्या एका युझरनं डिलिव्हरी बॉयच्या प्रतिभेचं कौतुक केलं आहे. तर एकानं आता डिलिव्हरी बॉयला टीप देणं बंद करणार असल्याचं जाहीर करुन टाकलं आहे. दरम्यान, व्हिडिओतील तरुण खरंच झोमेटोचा डिलिव्हरी बॉय आहे की नाही हे स्पष्ट झालेलं नाही. कदाचित त्यानं डिलिव्हरी बॉयचा गणवेश फक्त रील बनवण्यासाठी परिधान केला असावा अशीही शक्यता आहे.