नवी दिल्ली :सोशल मीडियावर सध्या एक व्हिडिओ चांगलाच व्हायरल होत आहे. या व्हिडिओत Swiggy कंपनीचा एक डिलिव्हरी एक्झिक्युटिव्ह Zomato कंपनीच्या एक्झिक्युटिव्हला मदत करताना दिसत आहे. दिल्लीच्या कडक उन्हात, ज्याप्रकारे स्विगीच्या डिलिव्हरी एक्झिक्युटिव्हने प्रतिस्पर्धी कंपनी झोमॅटोच्या कर्मचाऱ्याला मदत केली, त्याने सर्वांची मनं जिंकली आहेत.
सोशल मीडिया प्लॅटफॉर्म Reddit वर शनिवारी पोस्ट केलेल्या एका व्हिडिओमध्ये, मोटरसायकलवर एक स्विगी डिलिव्हरी एक्झिक्युटिव्ह सायकलवरुन डिलिव्हरी देणाऱ्या झोमॅटो एक्झिक्युटिव्हला मदत करताना दिसत आहे. स्विगीवाल्या व्यक्तीने झोमॅटो एक्झिक्युटिव्हचा हात पकडून सायकल वेगाने चालवण्यास मदत करताना दिसत आहे.
हा व्हिडिओ सध्या मोठ्या प्रमाणात व्हायरल होत आहे. नेटकरी त्या स्विगी कंपनीच्या डिलिव्हरी एक्झिक्युटिव्हचे कौतुक करत आहेत. एका यूजरवर कमेंट केली की, "मी अनेकदा स्विगीच्या बॅगमधून झोमॅटो आणि झोमॅटोच्या बॅगमधून स्विगीचे पार्सल बाहेर निघताना पाहिले आहे." कोरोना महामारीनंतर फुड डिलिव्हर करणार्या कंपन्यांवर दबाव वाढला आहे. कंपन्या प्रतिस्पर्ध्यांना पराभूत करण्यासाठी जलद वितरणाचे आश्वासन देत आहेत. यामुळे डिलिव्हरी एक्झिक्युटिव्हवरही कामाचा ताण वाढला आहे.