Three Eggs Magic Viral Video on Social Media: जादूचे खेळ लोकांना खूप आवडतात. जादू ही हातचलाखी असते हे साऱ्यांना माहिती असले तरीही जादूचे खेळ पाहण्याची मजा काही औरच असते. अमिताभ बच्चन यांच्या 'जादूगार' या चित्रपटातील एका गाण्यातही हेच सांगितलं होतं की जादू म्हणजे केवळ हाताचा चलाखीने वापर, आणि ती चलाखी अशी असावी की कोणालाही कळू नये. असाच एका चिमुरडीचा व्हिडीओ सध्या व्हायरल होतोय. या छोट्या जादूगाराच्या जादूने इंटरनेटवर चांगलाच धुमाकूळ घातला आहे.
व्हायरल होत असलेल्या व्हिडिओमध्ये दिसतंय की एक मुलगी रस्त्यावर उभी आहे आणि तिच्या आजूबाजूला काही लोक उभे आहेत. त्या साऱ्या लोकांना ती चिमुरडी जादूचे खेळ दाखवत आहे. छोट्या जादूगार मुलीने टेबलावर ३ अंडी ठेवली आहेत आणि ती दोन वाट्यांनी झाकून ठेवली आहेत. त्यानंतर ती एक अंडे तिच्या हातात घेते आणि काठी फिरवते आणि दुसरी वाटी उघडते, तर सगळी अंडी त्या वाटीखाली असतात. हे सगळं ती इतक्या वेगाने करते की तिला हे सगळं कसं जमतं ते पाहून लोकंही आश्चर्यचकित होतात. पाहा व्हिडीओ-
चिमुरड्या जादूगाराचा हा व्हिडीओ @TansuYegen नावाच्या अकाऊंटवरून ट्विटरवर शेअर करण्यात आला आहे. हा व्हिडीओ लोकांना चांगलाच आवडला आहे. केवळ ३९ सेकंदांच्या या व्हिडिओने ट्विटरवर १.६० लाखांहून अधिक व्ह्यूज मिळवले आहेत. अनेत युजर्स त्यावर कमेंट करून त्या चिमुरडीचं कौतुक करतानाही दिसत आहेत.