Social Viral : आईसारखे दैवत साऱ्या जगतावर नाही, म्हणून श्री कारानंतर शिकावे अ,आ, ई, अशी एक चारोळी प्रचलित आहे. याचा प्रत्यय सोशल मीडियावर व्हायरल होणारा हा व्हिडिओ तु्म्हाला नक्कीच येईल. आईची माया ही निराळीच असते. आईच्या प्रेमाची तुलना जगातील कोणत्याच गोष्टीबरोबर करता येत नाही. वेळप्रसंगी आपल्या लेकरासाठी संकटासमोर ढाल बनून जी उभी राहते ती म्हणजे आई असते. मनुष्य असो किंवा प्राणी दोघांच्या भावना या सारख्याच. फक्त माणूस आपल्या मनातील इच्छा, विचार बोलून व्यक्त होतो, पण मुक्या जनावरांना तेही करता येत नाही. पण अनेकदा त्यांनी केलेली कृत्यं आपल्या भावनांना साद घालतात.
अलिकडेच इन्स्टाग्रामवर माय-लेकाराच्या नात्याचं वास्तव मांडणारा भावनिक व्हिडिओ नेटकऱ्यांच्या समोर आला आहे. या व्हिडिओमध्ये एका दुकानात बंद असलेल्या आपल्या पिल्लाला वाचवण्यासाठी आईने केलेली धडपड कॅमेऱ्यात कैद करण्यात आली आहे. या व्हायरल व्हिडिओमध्ये लहानसं कुत्र्याचं पिल्लू दुकानात अडकलं होतं. आपल्या पिल्लाचा दुकानाच्या आतून येणारा आवाज ऐकूण ती आई कासावीस झाल्याचं पाहायला मिळतंय. आपल्या लेकराला बाहेर काढण्यासाठी ती आई आपल्या नखांचा वापर करत खड्डा खणताना दिसतेय. शटरची लादी फोडून ती दुकानाच्या आत जाण्याचा प्रयत्न करते, पण तिचा हा प्रयत्नदेखील फसतो. दुकानात अडकेल्या पिल्लाचा आवाज ऐकून आसपासच्या लोकांनी त्या दुकानदाराचा नंबर शोधून काढला. अखेर त्यांच्या प्रयत्नांना यश आलं आणि या मायलेकाची भेट घडून आणली.
हा व्हिडिओ tarotguiddence-by-k या इन्स्टाग्राम अकाउंटवरून शेअर करण्यात आला आहे. तसेच अनेकांनी आपल्या लाईक्स आणि कमेंट्सच्या माध्यमातून प्रतिक्रिया नोंदवल्या आहेत. हा व्हिडिओ नेटकऱ्यांना प्रचंड आवडला असून काहींनी तर या आईचं तोंडभरून कौतुक केलं आहे.