Viral Swiggy Boy: सध्या सोशल मीडियावरस्विगीच्या एका डिलिव्हरी बॉयचा व्हिडिओ चांगलाच व्हायरल होत आहे. हा व्हिडिओ मुंबईतील असल्याचा दावा करण्यात येत आहे. तुम्ही म्हणाल यात काय विशेष? तर, हा डिलिव्हरी बॉय भर पावसात चक्क घोड्यावरुन पार्सल डिलिव्हरी करताना दिसत आहे.
व्हिडिओमध्ये स्विगीचा डिलिव्हरी बॉय मुसळधार पावसात घोड्यावर स्वार होऊन आपल्या ग्राहकांना अन्न पोहोचवताना दिसत आहे. यादरम्यान पाठीमागील कारमध्ये बसलेल्या व्यक्तीने त्याचा व्हिडिओ बनवून सोशल मीडियावर व्हायरल केला. हा व्हिडिओ व्हायरल झाल्यानंतर लोकांनी मुसळधार पावसात डिलिव्हरी करणाऱ्या त्या व्यक्तीचे कौतुक केले. आता स्विगी कंपनीनेही यावर आपली प्रतिक्रिया दिली आहे.
कंपनीकडून 5 हजारांचे बक्षीसकंपनीने अधिकृत निवेदन जारी करत म्हटले की, एक व्हिडिओ आमच्या निदर्शनास आला आहे, ज्यामध्ये एक अज्ञात व्यक्ती आमच्या कंपनीचा लोगो असलेली बॅग घेऊन जाताना दिसत आहे. तो मोठ्या आत्मविश्वासाने घोड्यावर बसलेला दिसत आहे. आम्हाला त्या व्यक्तीबद्दल अधिक माहिती जाणून घ्यायची आहे. तो तरुण कोण आहे? इतक्या मुसळधार पावसात मुंबईच्या रस्त्यावर डिलिव्हरी देण्यासाठी का बाहेर पडला? त्याने डिलिव्हरी दरम्यान घोडा कुठे पार्क केला होता? या प्रश्नांसोबतच कंपनीने इंटरनेट यूजर्स आणि सामान्य लोकांना त्या अनोळखी व्यक्तीची माहिती देण्यासही सांगितले आहे. एवढेच नाही तर घोड्यावर स्वार झालेल्या डिलिव्हरी बॉयची अचूक माहिती जो कोणी देईल, त्याला कंपनी पाच हजार रुपयांचे बक्षीस जाहीर केले आहे.