Daughter Father Relationship Emotional Video: वडील आणि मुलगी यांचं नातं काही वेगळंच असतं. वडील आपली मुलगी मोठी होईपर्यंत सर्वतोपरि तिचं संरक्षण करतात. आपल्या मुलीची प्रत्येक इच्छा पूर्ण करण्यासाठी वडील झटत असतात. नंतर जेव्हा मुली मोठ्या होतात, तेव्हा त्यादेखील वडिलांचा नीटपणे सांभाळ करतात. असाच एक व्हिडीओ सध्या चांगलाच व्हायरल होत असून सोशल मीडिया यूजर्स याची चर्चा करत आहेत. या व्हिडिओमागची कहाणी थोडीशी मजेदार असली तरी प्रचंड भावूक करणारी आहे. हे प्रकरण ऑस्ट्रेलियातील असल्याचे सांगण्यात येत आहे आणि हा व्हिडिओ टिकटॉकवर शेअर करण्यात आला होता.
'न्यूयॉर्क पोस्ट'च्या वृत्तानुसार, एका मुलीचे वडील गंभीर आजारी होते आणि रुग्णालयात ते शेवटच्या घटका मोजत होते. वडिलांना रम (दारू) पिण्याची आवड होती. त्यामुळे वडीलांना रम पिण्याचा हट्ट धरला. म्हणूनच मुलीने वडिलांना अक्षरश: रमचे इंजेक्शन देऊन वडिलांची इच्छा पूर्ण केली. पेनलोप नावाच्या मुलीने हे कृत्य केले. तिने तिच्या वडीलांना त्यांची आवडती बुंडाबर्ग नावाची रम इंजेक्शनच्या मार्फत पाजली. व्हिडिओमध्ये दिसत आहे की, वडील हॉस्पिटलच्या बेडवर मरणासन्न अवस्थेत आहेत आणि मुलगी त्यांच्या बाजूला शांतपणे उभी आहे. व्हिडीओच्या कॅप्शनमध्ये लिहिले आहे की, मरण्यापूर्वी मुलीने वडिलांना त्यांची शेवटी इच्छा म्हणून आवडत्या पेयाचा घोट इंजेक्शनमधून दिला.
हा व्हिडिओ पाहिल्यानंतर आणि कथा जाणून घेतल्यानंतर सोशल मीडियावरील प्रत्येक जण खूप भावूक झाल्याचे दिसले. वडीलांनी हातवारे करून सांगण्याचा प्रयत्न केला की त्यांना रम खूप आवडते. त्यानंतर मुलीने अखेर इंजेक्शन मधून त्यांना रम पाजली. त्यानंतर काही तासांनी वडीलांनी अखेरचा श्वास घेतला. वडील आणि मुलीचा हा व्हिडिओ सध्या सोशल मीडियावर चांगलाच व्हायरल होत आहे. या व्हिडिओने अनेकांची मने जिंकली आहेत.