Sachin Tendulkar remembers Shane Warne | भारताचा दिग्गज क्रिकेटपटू सचिन तेंडुलकर नेहमीच विविध कारणांमुळे चर्चेत असतो. सचिन सोशल मीडिया साईट्सवर फारसा अँक्टीव्ह नसतो, पण तरीही त्याच्या मोजक्या पोस्ट चर्चेत असतात. सचिन तेंडुलकरची अशीच एक पोस्ट सध्या व्हायरल झाली आहे. सचिनने आपला जवळचा मित्र दिवंगत शेन वॉर्न याच्याबद्दल ही पोस्ट केली आहे.
इन्स्टाग्राम पोस्ट करत सचिनने शेन वॉर्नबद्दलच्या आठवणींना उजाळा दिला असून एक भावनिक पोस्ट केली आहे. युके मध्ये शेन वॉर्न जेथे राहायचा, त्याजवळच असलेल्या एका हॉटेलमध्ये सचिन तेंडुलकर आणि शेन वॉर्न नेहमी डिनरसाठी जात असत. सचिन नुकताच या हॉटेलमध्ये डिनर करण्यासाठी बसला होता, त्यावेळी त्याने फोटो पोस्ट करत शेन वॉर्नसाठी भावनिक पोस्ट केली.
दरम्यान, ऑस्ट्रेलियाचा दिग्गज फिरकीपटू शेन वॉर्न याचं ४ मार्च २०२२ वयाच्या ५२व्या वर्षी हृदयविकाराच्या तीव्र झटक्याने निधन झाले. तो थायलंडमध्ये होता. त्यावेळी त्याच्या विलामध्ये ही घटना घडली. त्याला हार्ट अँटक आल्यानंतर त्याच्यावर वैद्यकीय उपचार करण्यात आले पण त्या उपचारांना त्याने प्रतिसाद दिला नाही, असं त्याच्या मीडिया टीमने जारी केलेल्या प्रसिद्धीपत्रकात नमूद केलं. शेन वॉर्नच्या अकाली निधनामुळे क्रिकेटविश्वाला मोठा धक्का बसला. शेन वॉर्न आणि सचिन तेंडुलकर हे दोघे मैदानात एकमेकांचे कट्टर प्रतिस्पर्धी असले तरी मैदानाबाहेर खूप चांगले मित्र होते. त्यामुळे सचिनने वॉर्नच्या निधनानंतरही अतिशय भावनिक संदेश लिहिला होता.