नवी दिल्ली ।
लग्न म्हणजे जीवनातील एक महत्त्वाचा क्षण असतो, त्यामुळे हा क्षण अविस्मरणीय करण्यासाठी लोक विविध मार्गांचा अवलंब करतात. एका नवरदेवानं आपल्या लग्नात आलेल्या पाहुणे मंडळींना एक अनोखं सरप्राइज दिलं आहे. "माझी होणारी बायको ४ महिन्यांची गरोदर आहे", असं सांगून नवरदेवानं सर्व वऱ्हाडी मंडळींना आश्चर्याचा धक्काच दिला. माझी होणारी पत्नी १६ आठवडे अर्थात ४ महिन्यांची गरोदर असून लवकरच माझ्या बाळाची आई होणार असल्याचं नवरदेवानं जाहीरपणे सांगितलं. लक्षणीय बाब म्हणजे वधू आणि वरानं हे सरप्राइज लग्नाच्या दिवसासाठी गुपित ठेवलं होतं.
दरम्यान, नवविवाहित जोडप्यानं याचा व्हिडीओ टिकटॉकवर शेअर केला आहे. "आजचा दिवस आमच्यासाठी खूप महत्वाचा आहे. लग्नासाठीचं ठिकाण ठरवण्यापासून ते सर्व सुरळीत पार पाडण्यासाठी खूप कष्ट घेतले. मात्र आजचा आनंदाचा क्षण आमच्यासाठी अविस्मरणीय आहे, कारण माझी होणारी बायको गरोदर आहे आणि आम्ही लवकरच एका बाळाचे आई-बाबा होणार आहोत", असं नवरदेवानं जाहीर केलं.
'द मिरर'ने दिलेल्या वृत्तानुसार, या नवदाम्पत्याचे नाव टेलर आणि डॅन स्ट्रॉटन असं आहे. "आमच्या लग्नात येणाऱ्या पाहुणे मंडळीसाठी एक सरप्राइज ठेवलं होतं. आमच्या घरात नवीन पाहुण्याच आगमन सप्टेंबर २०२२ मध्ये होणार आहे याची माहिती सर्वांना दिली", असं टेलरनं टिकटॉवर एक व्हिडीओ शेअर करत कॅप्शनमध्ये लिहिलं आहे.
विशेष म्हणजे या व्हिडीओला आतापर्यंत तीन लाखांहून अधिक व्ह्यूज मिळाले आहेत. व्हिडीओमध्ये डॅन स्ट्रॉटन आणि टेलर लग्नाच्या कपड्यांमध्ये दिसत आहेत. ऐन लग्नाच्या दिवशी नवरदेव डॅन यानं टेलर चार महिन्यांची गरोदर असल्याचं जाहीर केलं.
लग्नाच्या दिवशी सर्वांसमोर आपली होणारी बायको गरोदर असल्याची बातमी देणारा हा व्हिडीओ खूप चर्चेत आहे. सोशल मीडियावरील अनेक युजर्संनी विविध कमेंट केल्या आहेत. अनेकांनी अभिनंदन केलं आहे. तर काहींनी मजेशीर प्रतिक्रिया दिल्या आहेत.