मध्य प्रदेशमधून एका धक्कादायक घटनेचा व्हिडीओ समोर आला आहे. या व्हायरल झालेल्या व्हिडीओ एक तरूणी रेल्वे समोर येऊन आत्महत्या करण्याचा प्रयत्न करताना दिसत आहे. मात्र, सुदैवाने एक ऑटोरिक्षा चालक वेळीच तिथे जाऊन तरूणीचा जीव वाचवतो. India.com च्या रिपोर्टनुसार, रेल्वे फाटकासमोर रेल्वे येण्याची वाट पाहणाऱ्या तरूणीने निळ्या रंगाच कुर्ता घातला आहे आणि चेहरा दुपट्टयाने बांधला आहे.
रेल्वे फाटकावर अनेक गाड्या थांबल्या होत्या. तिथेच एक तरूणी रेल्वेची वाट बघत उभी होती. तिच्या हालचालीवरून रिक्षा चालकाला शंका आली होती. तो तिचा व्हिडीओ बनवत होता. तरूणी रेल्वे जवळ येण्याची वाट बघत होती. जशी रेल्वे जवळ आली तरूणी फाटका खालून रेल्वे ट्रॅकवर जाऊन उभी राहिली. अशात रिक्षा चालकाने हुशारी दाखवली आणि तो तरूणीला खेचण्यासाठी धावला.
मोहसीन असं या रिक्षा चालकाचं नाव असून त्याला अंदाज आला होता की, तरूणी काहीतरी करणार आहे. त्याने वेळीच तरूणीला रेल्वे फाटकावरून बाजूला केलं. त्याने तिला पकडलं तेव्हा तरूणी रडत रडत सोडण्याची मागणी करत होती. मोहसीन तिला सुरक्षित ठिकाणी घेऊन गेला. मोहसीने तरूणीचा जीव वाचवला. नंतर काही लोकांनी तरूणीला समजावण्याचा प्रयत्न केला.