प्रत्येक आईचं आपल्या मुलांवर जीवापाड प्रेम असतं. त्यांच्यासाठी ती सर्वकाही करते. कितीही संकटं आली तरी ती आपल्या मुलाला वाचवण्यासाठी जीवाची पर्वा करत नाही. अशीच एक हृदयस्पर्शी घटना आता समोर आली आहे. भयानक अपघाताचा एक व्हिडीओ सध्या सोशल मीडियावर जोरदार व्हायरल होत आहे. एक आई आपल्या मुलाला मोठ्या संकटातून कशी वाचवते हेच व्हायरल व्हिडीओमध्ये पाहायला मिळत आहे. अंगावर काटा आणणारा हा व्हिडीओ आतापर्यंत लाखो लोकांनी पाहिला आहे.
बाईकवरून जात असताना मुलगा अचानक ट्रक खाली येतो पण त्यानंतर जे काही घडतं त्याला चमत्कारच म्हणता येईल. व्हिएतनाममधील एका अपघाताचा व्हिडीओ समोर आला आहे. यामध्ये एक व्यक्ती आपल्या पत्नी आणि मुलासह बाईकवरून जाताना दिसत आहे. त्यानंतर एक कार त्यांच्या वाहनाला ओव्हरटेक करते आणि याचदरम्यान कार त्यांच्या बाईकला धडकली. मागे बसलेले आई व मुलगा दोघेही बाईकवरून रस्त्यावर पडले आणि तितक्यात समोरून एक भरधाव ट्रक येत आहे.
मुलगा ट्रकच्या चाकाखाली य़ेणार इतक्यात आई आपल्या मुलाला वाचवते. तिने प्रसंगावधान दाखवून एका हाताने मुलाला उचलले आणि मुलगा ट्रकखाली येण्यापासून वाचला. आईला काहीही होत नाही आणि मुलगादेखील यामुळे वाचतो. हे सर्व फक्त 12 सेकंदात घडतं. आतापर्यंत या व्हिडिओला तब्बल 49 लाखांहून अधिक व्ह्यूज मिळाले आहेत. हा व्हिडिओ पाहून लोकांनी आईचे भरभरून कौतुक केलं आहे. तर एका व्यक्तीने तिला 'मदर ऑफ द इयर' म्हटलं आहे. एका हिंदी वेबसाईटने याबाबतचे वृत्त दिले आहे.