सिंह म्हणजे जंगलाचा राजा. ज्याला भलेभले प्राणीही घाबरतात. पण म्हणतात ना अपनी गल्ली में कुत्ता भी शेर होता है, मग भले समोर खरा सिंहही का असेना. याचा प्रत्यय देणारा एक व्हिडीओ सोशल मीडियावर (Social media) व्हायरल होतो आहे. या व्हिडिओत कुत्र्याला घाबरून चक्क जंगलाचा राजा म्हणजे सिंहानेही धूम ठोकली आहे.
सिंह आणि कुत्र्याचा मजेशीर व्हिडीओ समोर आला आहे. एक सिंह कुत्र्याची शिकार करायला आला होता. आता कुत्रा आणि सिंह आमनेसामने आले म्हणजे कोण जिंकेल असं विचारलं तर साहजिक आपण सिंह म्हणू. पण या व्हिडीओतील कुत्र्याने मात्र आपल्याला चुकीचं ठरवलं. सिंह नाही तर चक्क कुत्र्याने बाजी मारली आहे. तुम्हाला अजूनही विश्वास बसत नाही का? मग व्हिडीओ पाहा. व्हिडीओ पाहून तर तुम्ही हैराणच व्हाल.
व्हिडीओत पाहू शकता एक कुत्रा उभा आहे. तिथं झाडांमधून एक सिंह बाहेर पडतो. हळूहळू पावलं टाकत तो येतो. तुम्हाला माहिती असेल कुत्र्यांचीसुद्धा एक हद्द ठरलेली असते. म्हणजे आपल्या परिसरात ते इतर कुत्र्यांना येऊ देत नाही आणि कुणी आलं तर मग त्याला ते सोडत नाही. या कुत्र्याने तर सिंहालाही सोडलं नाही.
कुत्रा सिंहावर भुंकतच राहतो. सिंहाच्या डरकाळीनेही त्याला काही फरक पडत नाही. आपली डाळ काही इथं शिजणार नाही हे सिंहालाही कळून चुकतं. शेवटी तो हार पत्करतो आणि आपला जीव वाचवण्यासाठी म्हणून गुपचूप तिथून काढता पाय घेतो. कुत्र्याचं भयानक रूप पाहून तोही घाबरतो आणि तिथून धूम ठोकून पळतो.
आयएफएस अधिकारी सुशांत नंदा यांनी आपल्या ट्विटर अकाऊंटवर हा व्हिडीओ पोस्ट केला आहे. हे काय चाललं आहे, असं कॅप्शन त्यांनी या पोस्टला दिलं आहे. यावर बऱ्याच युझर्सनी अपनी गल्ली में कुत्ता शेर होता है अशीच कमेंट दिली आहे.