सोशल मीडियाच्या जगात कोण कधी व्हायरल होईल याची कल्पना देखील केली जाऊ शकत नाही. प्रसिद्धी मिळवण्यासाठी कोण कोणत्या थराला जाईल याबाबत विचार न केलेलाच बरा... आजकाल टॅटू काढणे सामान्य बाब झाली आहे. लोक हात आणि पायांपासून शरीराच्या वेगवेगळ्या भागांवर टॅटू बनवतात. अनेकदा सोशल मीडियावर परदेशी नागरिकांचे भन्नाट व्हिडीओ चांगलेच व्हायरल होत असतात, ज्यामध्ये त्यांचे संपूर्ण शरीर टॅटूने भरलेले असते. आता एका भारतीयाने कोरलेल्या टॅटूची भलतीच चर्चा रंगली आहे. त्याने चक्क ओठांच्या आतील भागात प्रेयसीचे नाव गोंदले आहे.
सोशल मीडियावर हा जुना व्हिडीओ मोठ्या प्रमाणात व्हायरल होत आहे. गेल्या वर्षी डिसेंबर महिन्यात एका युजरने एक रील पोस्ट केली होती, ज्यामध्ये एक व्यक्ती त्याने बनवलेला टॅटू फ्लाँट करताना दिसत आहे. हा टॅटू त्याने हात आणि पायावर नाही तर ओठांच्या आतील भागावर गोंदला आहे.
व्हायरल होत असलेल्या व्हिडीओमध्ये पाहायला मिळते की, एका व्यक्तीच्या ओठाच्या आतील बाजूस त्याच्या प्रेयसीचे नाव लिहिण्यात आले आहे. 'अमृता' असे या मुलीचे नाव आहे. सर्वप्रथम नाव एका सुंदर फॉन्टमध्ये लिहिलेले आहे आणि ओठांच्या आत पेस्ट केले आहे. त्याचा ठसा ओठांवर पडला की मग त्यावर टॅटू काढला जातो. शेवटी ती व्यक्ती आपले ओठ उघड करून टॅटू दाखवत आहे. हा व्हायरल व्हिडीओ आहे, त्यामुळे हा टॅटू प्रत्यक्षात गोंदवण्यात आला आहे की केवळ व्हायरल होण्याच्या उद्देशाने तो पेस्ट करण्यात आला आहे, हे ठामपणे सांगता येणार नाही.
ओठ हा अतिशय संवेदनशील भाग आहे, त्यावर टॅटूची सुई घातली तर त्यातून रक्त येणे साहजिकच आहे. हा व्हिडीओ सोशल मीडियावर चांगलाच व्हायरल होत आहे. नेटकऱ्यांनी या व्हिडीओवर भन्नाट प्रतिक्रिया दिल्या आहेत. एकाने मिश्किलपणे म्हटले की, मला वाटले ही कर्करोगाची जाहिरात आहे. एक म्हणाला की, आता ब्रेकअप झाले तर तोंड उघडू नकोस.