लोकमत न्यूज नेटवर्कमुंबई : मुंबईतल्या एका चाळकऱ्याने आपले घर भाड्याने देण्यासाठी त्याच्या खोलीचा व्हिडीओ सोशल मीडियावर पोस्ट केल्यानंतर आता त्याच्यावरून चांगलेच वादंग निर्माण झाले आहे. घर चाळीतले असेल तरी छोटेखानी वन-बीएच-के घर आहे. मात्र, त्या घरासाठी त्याने प्रति महिना ४५ हजार रुपयांचे भाडे मागितल्याने सोशल मीडियावर अनेक जण संबंधित व्यक्तीवर टीका करताना दिसत आहेत.
हा व्हिडीओ माटुंगा येथील असल्याची माहिती असून, या घराचे आकारमान लहान आहे. बेडरूममध्ये जेमतेम बेड सामावला जाऊ शकतो, तर बाथरूमदेखील लहान आहे. याचा व्हिडीओ पोस्ट केल्यानंतर अनेक लोकांनी व्यक्त होत संबंधित व्यक्तीची खिल्ली उडवली आहे, तसेच रागदेखील व्यक्त केला आहे.
महिन्याला ४५ हजार रुपयांचे भाडे द्यायचे तर पार्किंग आहे का, किंवा चाळीतल्या खोलीसाठी एवढे भाडे आकारायला लाज वाटत नाही का, अशादेखील संतप्त प्रतिक्रिया लोकांनी व्यक्त केल्या आहेत.