sindhudurg news: बेपत्ता वृद्धाचा मृतदेह सापडला, गडनदीपात्रानजीक झाडाला गळफास घेतलेल्या स्थितीत आढळला

कणकवली: गेल्या महिनाभरापासून बेपत्ता असलेले  कणकवली तालुक्यातील हरकुळ खुर्द येथील मधुकर नारायण मलये (वय-७५) याचा मृतदेह आढळून आला. आज, गुरूवारी सकाळी नाटळ येथील गडनदी पात्राच्या कडेला असलेल्या झाडाला गळफास घेतलेल्या स्थितीत आढळले. मृतदेह बराचसा कुजलेल्या स्थितीत होता. मात्र अंगावरील कपडे व करगोट्यावरून त्यांची ओळख पटली.नाटळ येथील नदीपात्रानजीक एक मृतदेह सडलेल्या स्थितीत असल्याची चर्चा मागील काही दिवसांपासून सुरू होती. गुरुवारी याबाबतची माहिती समजताच पोलिस निरीक्षक अनिल जाधव, सहाय्यक पोलिस निरीक्षक सागर खंडागळे यांनी पथकासह घटनास्थळी धाव घेतली. दरम्यान, बेपत्ता मधुकर मलये यांच्या कुटुंबियांनाही घटनास्थळी बोलविण्यात आले. त्यांनी मृतदेह पाहिल्यावर तो मधुकर मलये यांचा असल्याचे सांगितले. त्यामुळे त्या मृतदेहाची ओळख पटली आहे. या घटनेबाबत अधिक तपास पोलिस करीत आहेत.