फोंडाघाटात दरड कोसळली--आठ तास वाहतूक ठप्प :

मुसळधार पावसाचा फटका

कणकवली : मुसळधार पावसाचा फटका तालुक्यातील फोंडाघाटाला बसला असून, काल-सोमवारी रात्री सव्वादहा वाजण्याच्या सुमारास या घाटात तिसऱ्यांदा दरड कोसळली. त्यामुळे या मार्गावरील वाहतूक ठप्प झाली होती. तब्बल आठ तासांनंतर कोसळलेली दरड हटवून या मार्गावरील वाहतूक सुरळीत करण्यात आली. यावर्षी पावसाळ्यात या घाटात दरड कोसळण्याची ही तिसरी घटना आहे.
कोल्हापूर मार्गावर फोंडा बसस्थानकापासून सुमारे साडेनऊ किलोमीटर अंतरावर घाटात ही दरड कोसळली. या मार्गावरून फोंड्याच्या दिशेने येणाऱ्या एस.टी.तील प्रवाशांनी याबाबतची माहिती फोंडा येथील हेल्प अकॅडमीच्या कार्यकर्त्यांना भ्रमणध्वनीवरून दिली. आपत्कालीन व्यवस्थापन कक्षालाही याबाबत कळविण्यात आले. हेल्प अकॅडमीचे राजन चिके, महेश सावंत, संजय पावसकर, बाळा नानचे, पिंटू पटेल, आना नानचे, विठ्ठल पिळणकर, आदी कार्यकर्त्यांनी घटनास्थळी धाव घेतली. मोठे दगड रस्त्यावर कोसळले होते. हा मार्ग मोकळा होण्यास बराच वेळ लागणार असल्यामुळे एस.टी. तसेच इतर वाहनांमध्ये अडकलेल्या प्रवाशांना पाणी व बिस्किटांचे वाटप त्यांनी केले.
तहसीलदार समीर घारे, सार्वजनिक बांधकाम विभागाचे उपअभियंता के. कन्नादासन, पोलीस निरीक्षक रानमाळे यांच्यासह अन्य अधिकारी व कर्मचारीही घटनास्थळी दाखल झाले. पहाटे चार वाजण्याच्या सुमारास घाटात दाखल झालेल्या जेसीबीच्या साहाय्याने ही दरड हटविण्याचे काम सुरू करण्यात आले.
आज, मंगळवारी सकाळी सहा वाजण्याच्या सुमारास या मार्गावरून एकेरी वाहतूक सुरू करण्यात यश आले होते. तत्पूर्वी या मार्गावरील वाहतूक गगनबावडा घाटमार्गे वळविण्यात आली होती. त्यानंतर दुपारी एक वाजण्याच्या सुमारास या मार्गावरील दगड दूर करून हा मार्ग वाहतुकीसाठी खुला करण्यात आला. (वार्ताहर)