कुणकी हत्तींचे पथक ७ फेब्रुवारीला सिंधुदुर्गात

संजय कदम : हत्ती पाठविण्यास कर्नाटक सरकारची परवानगी

कुडाळ : जिल्ह्यात धुडगूस घालणाऱ्या हत्तींना प्रशिक्षित करण्यासाठी कर्नाटकातून येणाऱ्या कुणकी हत्तीच्या पथकाला येण्यासाठी कर्नाटक सरकारने ग्रीन सिग्नल दिला आहे. हे पथक ७ फेब्रुवारीला कुडाळ तालुक्यातील आंब्रड येथे पाच प्रशिक्षित हत्ती वैद्यकीय पथकासह दाखल होणार आहे, अशी माहिती वनक्षेत्रपाल संजय कदम यांनी दिली.
जिल्ह्यात थैमान घालून अनेकांचे प्राण घेणाऱ्या, करोडोंच्या मालमत्तेची नुकसानी करणाऱ्या हत्तींना पकडून त्यांना योग्य ठिकाणी न्यावे, याकरिता खासदार विनायक राऊत यांनी राज्य तसेच केंद्र शासनाकडे विशेष प्रयत्न केले होते. त्यांच्या या प्रयत्नांमुळे केंद्र शासनाने येथील हत्तींना पकडून त्यांना प्रशिक्षित करण्यासाठी कर्नाटकातील प्रशिक्षित हत्ती पाठविण्यासाठी मान्यता दिली होती. याला राज्य सरकारने मान्यता दिली, तरीही कर्नाटक सरकारची मान्यता मिळावी, याकरिता खासदार राऊत तसेच राज्य व केंद्र सरकार प्रयत्न करीत होते. या प्रयत्नांना यश आले असून, कुणकी हत्तींच्या पथकाला जिल्ह्यात पाठविण्यासाठी मान्यता दिली आहे.
डॉ. के. एस. उमाशंकर (वेटर्निटी डॉक्टर, राजीव गांधी नॅशनल पार्क, कर्नाटक) त्यांचे सहाय्यक म्हणून करूम भाई, दोड्डाप्पाजी हे वैद्यकीय पथकातील प्रमुख आहेत. पथकाला आवश्यक रक्कम आम्ही भरल्यामुळे हे पथक ७ फेब्रुवारी रोजी कर्नाटक येथून निघणार असून ते माणगाव आंब्रड येथे ९ फेब्रुवारी रोजी येईल, असेही कदम यांनी सांगितले.
हत्ती माणगाव खोऱ्यात असल्यास काम सुरू केल्यापासून तीन दिवसांत पथक सर्व हत्तींना पकडणार आहे. येथील तीनही रानटी हत्ती माणगाव खोऱ्यात असल्यामुळे हे हत्ती पथकाला पकडणे सोपे जाणार आहे, अशी माहिती कदम यांनी दिली. (प्रतिनिधी)
मान्यतेचे पत्र वनविभागाला
कुणकी हत्ती तसेच प्रशिक्षित डॉक्टर व माहुतांचे पथक पाठविण्यात येणार असल्याच्या मान्यतेचे पत्र कर्नाटक शासनाने नागपूर येथील मुख्य वनसंरक्षक व वन्यजीव विभागाला दिले असून ३० जानेवारीला कर्नाटकच्या मुख्य वनसंरक्षक व वन्यजीव विभागाने पाठविले.
प्रवास खर्च भरला
पथकाला प्रवास खर्च म्हणून ५० हजार ९६० रुपये संबंधित विभागाच्या बँक खाती जमा करा, असे या पत्रात नमूद केले होते. त्याप्रमाणे आम्ही शनिवारीच हे पैसे भरले असल्याची माहिती वनक्षेत्रपाल संजय कदम यांनी दिली.