मंत्री आदित्य ठाकरे यांच्या सुरक्षा ताफ्यातील गाड्यांना अपघात, खारेपाटण येथील घटना

एका गाडीच्या चालकाने अचानक ब्रेक मारला. त्यावेळी ताफ्यातील दोन ते तीन गाड्या एकमेकांवर आदळून हा अपघात झाला.

कणकवली : राज्याचे वन व पर्यटन मंत्री आदित्य ठाकरे सध्या कोकण दौऱ्यावर आहेत. दरम्यान त्याच्या सुरक्षा ताफ्यातील गाड्यांना अपघात झाल्याची घटना घडली. सुरक्षा ताफ्यातील दोन ते तीन गाड्यांना अपघात झाला आहे. मुंबई-गोवा महामार्गावर खारेपाटण चेक पोस्ट नजीक हा अपघात झाला आहे.मंत्री आदित्य ठाकरेसिंधुदुर्गवरून रत्नागिरीला जात असताना खारेपाटण येथील हॉटेल मधुबन या ठिकाणी सकाळी ११.३० वाजण्याच्या सुमारास हा अपघात झाला. यामध्ये मंत्री आदित्य ठाकरे यांच्या गाडीच्या मागे असलेल्या पोलीस सुरक्षा गाडीने वाहन क्र.०८-an-५४०९ या वरील चालकाने अचानक ब्रेक दाबल्याने पाठीमागे असलेली mh-०७-g-५६९१ व mh-०२-ak-०२६८ या तिन्ही गाड्या एकमेकांवर आदळल्या.याबाबतची माहिती वाहन चालक सुनील महादेव जाधव (रा. मुंबई) यांनी खारेपाटण चेक पोस्ट पोलीस स्टेशन येथे दिली. खारेपाटण दुरक्षेत्राचे पोलीस अधिकारी उद्धव साबळे, पराग मोहिते यांनी घटना स्थळी भेट देऊन माहिती जाणून घेतली. सुदैवाने या अपघातात मोठी दुर्घटना घडली नाही. मात्र गाड्याचे नुकसान झाले आहे. याबाबत अधिक पुढील तपास खारेपाटण पोलीस दुरक्षेत्राचे प्रमुख उद्धव साबळे करीत आहे.