चिपळुणात १० हजार जनजागृती पत्रके

पल्स पोलिओ : नगरपरिषद आरोग्य विभागातर्फे विशेष मोहीम, घरोघरी प्रबोधन

चिपळूण : येथील नगर परिषद आरोग्य विभागातर्फे प्रभागात २९ ठिकाणी पल्स पोलिओ बूथ उघडण्यात येणार असून, १८ रोजी ० ते ५ वयोगटातील बालकांना डोस दिले जाणार आहेत. या कार्यक्रमाअंतर्गत १० हजार जनजागृती पत्रकांचे घरोघरी वाटप करण्यात आले आहे. पोलिओ निर्मुलनासाठी नगर परिषद आरोग्य विभागातर्फे दि. १८ व २२ फेब्रुवारी या दरम्यान ० ते ५ वयोगटातील मुलांना पल्स पोलिओचे डोस पाजण्यात येणार आहेत. या अनुषंगाने संबंधित कर्मचाऱ्यांना प्रशिक्षणही देण्यात आले आहे.
शहर परिसरात नगर परिषद दवाखाना, खेंड मराठी शाळा, परांजपे मोतीवाले हायस्कूल, मापारी मोहल्ला उर्दू शाळा, उक्ताड गणपती मंदिर, गोवळकोट मराठी शाळा, गोवळकोट उर्दू शाळा, भोईवाडा शाळा, आफ्रीन पार्क, गोवळकोट रोड, विठ्ठल मंदिर साळी समाज, पेठमाप मराठी शाळा, कन्या शाळा केदार मंदिर-राम मंदिर, महाराष्ट्र हायस्कूल, मुरादपूर मराठी शाळा, वडार कॉलनी शाळा, बहादूरशेख आॅक्ट्राय नाका, बांदल हायस्कूल, रावतळे मराठी शाळा, ओझरवाडी शाळा, शिवाजीनगर एस. टी. बसस्थानक, युनायटेड इंग्लिश स्कूल, पाग बौद्धवाडी, पाग मराठी शाळा, कृष्णेश्वर मंदिर कैलास भवन पाग, पाग गोपाळकृष्णवाडी, मध्यवर्ती बसस्थानक तसेच फिरते पथक यांच्या माध्यमातून हा उपक्रम राबवला जाणार आहे. दुसऱ्या टप्प्यातील डोसही बालकांना त्याच केंद्रावर दिले जाणार आहेत. या कार्यक्रमाच्या यशस्वीतेसाठी नगराध्यक्ष सावित्री होमकळस, उपनगराध्यक्ष लियाकत शाह, उपविभागीय अधिकारी रवींद्र हजारे, मुख्याधिकारी जयंत जावडेकर, आरोग्य समिती सभापती रुक्सार अलवी, वैद्यकीय अधिकारी डॉ.प्रिती शिंदे, वैद्यकीय अधीक्षक डॉ.कांचन मदार आदींसह प्रभागातील सर्व नगरसेवक प्रयत्न करीत आहेत. हा कार्यक्रम यशस्वी होण्यासाठी सर्व स्तरावर प्रयत्न करण्यात येत असल्याचे सांगण्यात आले. याचा लाभ घेण्याचे आवाहन करण्यात आले. (वार्ताहर)