वसुलीसाठी गेलेल्या दोघे वायरमनला मारहाण

पाचगणी : पाचगणी महावितरण कार्यालयाच्या दोन कर्मचाऱ्यांना बिल वसुलीसाठी गेले असता खिंगर (ता. महाबळेश्वर) येथे मारहाण झाल्याची घटना घडल्याने एकच खळबळ उडाली. दरम्यान, महावितरणच्या कर्मचाऱ्यांनी या विरोधात शुक्रवारी काम बंद आंदोलन करून पोलीस ठाण्यात मारहाण करणाऱ्यांविरोधात तक्रार दाखल केली आहे.

याबाबत पाचगणी पोलीस ठाण्यातून मिळालेली अधिक माहिती अशी की, खिंगर (ता. महाबळेश्वर) येथे गुरुवारी सायंकाळी ५:४५ च्या सुमारास थकीत बिल वसुलीसाठी महावितरणचे कर्मचारी नितीन आंब्राळे व शिवाजी मालुसरे गेले असता, या दोन वायरमनना सूरज दीपक झुंज, राकेश दीपक झुंज, बबिता दीपक झुंज यांनी मारहाण केल्याची घटना घडली. याबाबत वायरमन यांनी सांगितल्यावरून या तिघा विरोधात पाचगणी पोलीस ठाण्यात तक्रार दाखल करण्यात आली आहे. यावरून पाचगणी पोलिसांकडून या तिघांवर प्रतिबंधात्मक कारवाई करण्यात आली.

या घटनेचा अधिक तपास पाचगणी पोलीस ठाण्याचे सहायक पोलीस निरीक्षक सतीश पवार यांच्या मार्गदर्शनाखाली पोलीस हवालदार कैलाश रसाळ व त्यांचे सहकारी करीत आहेत.

दरम्यान, वायरमनला मारहाण करणाऱ्या संबंधितांवर कठोर कारवाई व्हावी, यासाठीचे निवेदन सहायक उपपोलीस निरीक्षक यशवंत महामुलकर यांना देण्यात आले असून, संबंधितांवर कठोर कारवाई व्हावी, या मागणीसाठी पाचगणी महावितरणच्या कर्मचाऱ्यांनी एक दिवसीय काम बंद आंदोलन केले आहे. यावेळी उपकार्यकारी अभियंता सचिन बाचल, सहायक अभियंता अशोक पाटील, पाचगणी शहर, वसूल अधिकारी जितेंद्र खांडके, राजू खरात व पाचगणी उपविभागातील कर्मचारी यावेळी उपस्थित होते.

फोटो : 26पाचगणी

पाचगणी महावितरणच्या कार्यालयासमोर शुक्रवारी महावितरणच्या कर्मचाऱ्यांनी काम बंद आंदोलन केले.