सातारा : शिवेंद्रसिंहराजे भोसले यांच्या आमदार फंडातून मंजूर असलेल्या सहा लाख रुपये खर्चाच्या शाहूपुरीतील शिवाजीनगर येथील महेश जांभळे घर रस्ता व कणसे- क्षीरसागर-जाधव घर रस्ता या दोन रस्त्यांच्या डांबरीकरणास मंगळवारी सुरुवात झाली.
शाहूपुरीतील शिवाजीनगर परिसर निर्मितीनंतर या दोन्ही रस्त्यांच्या डांबरीकरणाचे काम गेली अनेक वर्षे रखडलेल्या अवस्थेत होते. हा प्रश्न मार्गी लागण्यासाठी शाहूपुरी ग्रामविकास आघाडीसह स्थानिक नागरिक खूप दिवसांपासून प्रयत्नशील होते. याबाबत ओम ग्रुपचे विश्वतेज बालगुडे यांनी वारंवार प्रशासन आणि लोकप्रतिनिधी यांच्याकडे या कामासाठी तगादा लावला होता. अखेर आमदार शिवेंद्रसिंहराजे भोसले यांनी या दोन्ही रस्त्यांच्या डांबरीकरणासाठी सहा लाखांचा आमदार निधी देऊ केला.
आपल्या दारासमोर पहिल्यांदाच डांबरीकरण झालेल्या रस्त्याचा अनुभव मिळणार असल्याचा आनंद यावेळी उपस्थित महिला व अबाल-वृद्ध नागरिकांच्या चेहऱ्यावर स्पष्टपणे दिसून येत होता. लोकभावना लक्षात घेऊन हा प्रश्न मार्गी लावल्याबद्दल शिवेंद्रसिंहराजे यांचे स्थानिक नागरिक महेश जांभळे, नाना जाधव, प्रमोद देवरे, रामभाऊ शिंदे, राजेंद्र गोळे, अमृता पंढरपुरे, तसेच परिसरातील नागरिकांनी आभार मानले आहेत.
०६शाहूपुरी
शाहूपुरीतील शिवाजीनगर येथे दोन रस्त्यांच्या डांबरीकरणास मंगळवारी सुरुवात झाली.