म्हसवड बसस्थानकातील वाहतूक नियंत्रणाचे कक्ष बंद

म्हसवड : म्हसवड बसस्थानकाचे बांधकाम कित्येक महिन्यापासून रखडले आहे. सध्या तात्पुरत्या पत्राच्या शेडमध्ये तात्पुरते बसस्थानक सुरू आहे. यामुळे प्रवाशांना अनेक अडचणींचा सामना करावा लागत आहे. बसस्थानकात दोन वाहतूक निरीक्षकांची नेमणूक असताना एकजणच कामावर आहे. रविवारी कामावर रुजू असणाऱ्या वाहतूक नियंत्रकाची साप्ताहिक सुटी असल्याने कार्यालय कुलूपबंद होते. प्रवाशांनी बसची विचारणा नेमकी कोणाकडे करायची? असा प्रश्न निर्माण झाला आहे.

म्हसवड शहर नगरपरिषदेचे शहर असून, या शहराच्या परिसरात बारा वाड्या, बारा खेडी आहेत. माण तालुक्यातील सर्वांत मोठे लोकसंख्या असलेले शहर आहे. या ठिकाणी महाराष्ट्र आंध्र प्रदेश, कर्नाटक, मध्य प्रदेश या राज्यातील अनेकांचे कुलदैवत श्री सिद्धनाथ माता जोगेश्वरीचे पुरातन मंदिर आहे. त्यामुळे वर्षभर भाविकांची वर्दळ असते. त्यातच दररोज हजारो प्रवासी प्रवास करीत असतात. प्रवाशांची व भाविकांची सोय व्हावी म्हणून एसटी महामंडळाने येथील जुने बसस्थानक जमीनदोस्त करून नवीन अद्ययावत बसस्थानक उभारण्यासाठी तीन वर्षांपूर्वी बांधकाम सुरू केले आहे. कामात सातत्य नसल्याने हे काम अजूनही रखडल्याने सध्या उन्हाळ्याचे दिवस असल्याने प्रवाशांना सावली व पिण्याचे पाणी मिळत नसल्याने प्रचंड हाल होत आहेत. म्हसवड बसस्थानकात येणाऱ्या प्रवाशांची अवस्था आगीतून उठून फुफाट्यात पडल्यासारखी झाली आहे. महामंडळाच्या दुर्लक्षामुळेच बसस्थानकात घाणीचे साम्राज्य व बाहेरील दुकान हॉटेल व रहिवाशांचे गटारीचे घाण पाणी बसस्थानकात येत असल्याने सर्वत्र दुर्गंधी पसरली आहे. याकडे महामंडळाचे व नगरपरिषदेचे अधिकारी जाणीवपूर्वक दुर्लक्ष करीत असल्याचा आरोप प्रवासी करीत आहेत.

फोटो आहे...

राज्य परिवहन महामंडळाच्या म्हसवड आगारातील वाहतूक नियंत्रकाचे कक्ष रविवारी दिवसभर बंद होते. (छाया : सचिन मंगरुळे)