शितकडा धबधब्यावर रॅपलिंगचा थरार!

सातारा : अमृतमहोत्सवी स्वातंत्र्यदिनाच्या पार्श्वभूमीवर सातारा जिल्ह्यातील कुमठे गावचे गिर्यारोहक रोहित जाधव यांनी नाशिक जिल्ह्यातील शितकडा धबधब्यावरील तब्बल ३५० फुटांच्या रॅपलिंगचा थरार सुरक्षितपणे अनुभवला. त्यानंतर तिरंगा फडकावित ७५ वा भारतीय स्वातंत्र्यदिन दिमाखात साजरा केला.

या मोहिमेची सुरुवात उंभ्रांडे (ता. त्र्यंबकेश्वर, जि. नाशिक) गावापासून सुरू झाली. अर्ध्या तासाची पायपीट करून नदीपात्र ओलांडला की शितकडा धबधबा येतो. पहिला दहा फुटी खडकाळ टप्पा संपल्यानंतर धबधब्याचे मनात धडकी भरवणारे रौद्ररूप दिसते. रॅपलिंगच्या उतार झाल्यावर कड्यावर चित्तथरारक अनुभूतीसाठी या ठिकाणी चेहरा खडकाच्या दिशेने आणि पाठ दरीच्या दिशेने करून शरीरावर दोरीच्या साहाय्याने नियंत्रण ठेवून दरीच्या दिशेने झुकावे लागते. पहिला १०० फुटांचा टप्पा पार करताना हातातील दोरी वरती ओढून शरीर खाली घ्यावे लागते. शेवटचा ८० फुटांचा टप्पा हा धबधब्याच्या पाण्यातून गेल्याने रॅपलिंगचा हा अनुभव चित्तथरारक ठरतो.

अखेर सर्व आव्हानांना सामोरे जात साताऱ्याचे गिर्यारोहक रोहित जाधव, जळगावमधील प्रदीप बारी आणि नाशिक येथील दर्शन कापडणीस या गिर्यारोहकांनी टीम पॉइंट ब्रेक अ‍ॅॅडव्हेंचर्सच्या (नाशिक) चेतन शिंदे, जॉकी साळुंखे, चेतन बेंडकोळी, अमोल तेलंग, सौरव भगत, अर्चना गडदे या गिर्यारोहकांच्या मार्गदर्शनाखाली सुरक्षितपणे मोहीम फत्ते केली.

(चौकट)

आव्हानांचा सामना करत मोहीम फत्ते!

तब्बल ३५० फुटांचे चित्तथरारक रॅपलिंग, धुक्यात हरवलेला परिसर, मुसळधार पाऊस, ओले कातळकडे, निसरडी पाऊलवाट, शेवाळलेले खडक, हुडहुडी भरवणारी थंडी, कधी दोरीच्या साह्याने तर कधी काठीच्या साह्याने एकमेकांना आधार देत सुरक्षितपणे नदीपात्र ओलांडणे, अशी अनेक आव्हाने या मोहिमेत होती.

(चौकट)

मोहीम जवान अन् खेळाडूंना समर्पित

ही धाडसी मोहीम सांगली-कोल्हापूर-चिपळूण या पूरग्रस्त भागातील नागरिकांचे प्राण वाचविणारे एनडीआरएफचे जवान आणि टोकियो ऑलिम्पिकमध्ये ज्या खेळाडूंनी आपल्या भारत देशाला पदक मिळवून दिली अशा सर्व खेळाडूंना समर्पित केल्याचे रोहित जाधव यांनी सांगितले.

फोटो : १६ शितकडा रॅपलिंग

गिर्यारोहक रोहित जाधव यांनी शितकडा धबधब्यावर रॅपलिंगचा थरार अनुभवला. यानंतर राष्ट्रध्वज फडकावून स्वातंत्र्यदिनही साजरा केला.