सामाजिक सेवा पुरस्काराने

लोकमत न्यूज नेटवर्र्क

सातारा : सातारा पालिकेच्या लोकनियुक्त नगराध्यक्षा माधवी संजोग कदम यांचा चिक्कोडी (बेळगाव) येथे पार पडलेल्या एका सोहळ्यात नॅशनल रूलर डेव्हलपमेंट व हेल्थ ॲण्ड नेचर डेव्हलपमेंट सोसायटीच्या वतीने ‘विशेष सामाजिक गौरव पुरस्कार’ देऊन सन्मान करण्यात आला.

माजी खासदार अमरसिंह पाटील, माजी केंद्र्रीय मंत्री रत्नमाला सावनूर, माजी खासदार सुधीर सावंत यांच्या हस्ते व उद्योजक सुरेशदादा पाटील, जिल्हा पोलीसप्रमुख (गुलबर्गा) महेश मेघण्णावर, अरविंद घट्टी यांच्या उपस्थितीत या पुरस्कारांचे वितरण करण्यात आले.

कर्नाटक, महाराष्ट्र व गोवा अशा तीन राज्यांमधून सामाजिक, शैक्षणिक, वैद्यकीय, बांधकाम, अभियांत्रिकी या क्षेत्रामध्ये विशेष कार्य करणाऱ्या व्यक्तींची दरवर्षी या पुरस्कारासाठी निवड केली जाते. खासदार उदयनराजे भोसले यांच्या मार्गदर्शनाखाली सातारा पालिकेत केलेल्या उल्लेखनीय कामांची दखल घेत नगराध्यक्षा कदम यांना ‘विशेष सामाजिक गौरव पुरस्कार’ देऊन गौरविण्यात आले. या पुरस्काराने साताऱ्याच्या शिरपेचात मानाचा तुरा रोवला गेला आहे. यापूर्वी नगराध्यक्षा कदम यांना ‘लोकमत’ने ‘वुमन आयकॉन्स ऑफ सातारा’ व महाराष्ट्र जनरल फाउंडेशनमार्फत ‘भास्कर भूषण पुरस्कारा’ने गौरविले आहे. विविध क्षेत्रांतील मान्यवरांकडून त्यांचे अभिनंदन करण्यात आले.

फोटो : ०६ माधवी कदम

चिकोडी (बेळगाव) येथील कार्यक्रमात नगराध्यक्षा माधवी कदम यांचा ‘विशेष सामाजिक गौरव पुरस्कारा’ने सन्मान करण्यात आला.