चाचणी न केल्यास दुकाने बंदच

पुसेगाव : खटाव तालुक्यातील सुमारे ५० गावांत चौदा दिवसांपासून सुरू असलेला प्रतिबंधात्मक क्षेत्र निकष पूर्ण झाला आहे. निर्बंध शिथिल करून पुसेगावसह इतर ठिकाणी काही व्यवसाय सुरू झाले आहेत. मात्र दि. २० जूनपर्यंत पुसेगावतील सर्वच व्यापारी व दुकानदारांनी कोरोना चाचणी करणे आवश्यक आहे. सोमवार, दि. २१ पासून चाचणीचा पुरावा असल्याशिवाय दुकाने उघडता येणार नाहीत.

पुसेगावसह इतर भागातील नागरिकांनी दीड महिन्यांपासून शासनाच्या आदेशाचे पालन करत सर्व व्यवहार बंद ठेवले. त्यातच प्रांताधिकाऱ्यांनी ३१ मेच्या दरम्यान पुसेगाव हे प्रतिबंधात्मक क्षेत्र घोषित केल्याने पुन्हा १४ दिवस जनतेने लॉकडाऊन पाळला. सध्या खरीप हंगाम सुरू असल्याने शेतीशी निगडित दुकाने, भाजीपाला व फळविक्रेते, किराणा दुकाने, बँका सकाळी नऊ ते दुपारी दोन या कालावधीत सुरू आहेत. यात अवजारांच्या दुकानांना सवलत देणे गरजेचे असताना बंद राहिल्याने शेतकऱ्यांना त्रास सहन करावा लागत आहे.

पुसेगाव कोरोना केअर सेंटरमध्ये बाधितांचे प्रमाण सध्या ७.३८ असून या ठिकाणी सध्या केवळ ३५ कोरोनाबाधितांवर उपचार सुरू आहेत. त्यामुळे सोमवार दि. २१ पासून सर्वच दुकाने व व्यवसाय पूर्ववत सुरु होण्याची शक्यता आहे.

चौकट :

पुसेगावात कोरोना चाचणीची ७० रुग्णांची क्षमता असताना केवळ ३५ कोरोनाबाधितांवर उपचार सुरू आहेत. पुसेगावमध्ये कोरोनाबाधितांचे प्रमाण ७.३८ आहे. तो पाचच्या आत आणण्यासाठी प्रयत्न सुरू आहेत. शासनाच्या आदेशानुसार १८ ते ४४ वयोगटातील लसीकरणासाठी प्राथमिक आरोग्य केंद्राच्यावतीने आराखडा तयार करण्यात आला आहे. लवकरच लसीकरणास पुन्हा प्रारंभ करण्यासाठी यंत्रणा सज्ज झाली आहे. ज्येष्ठ नागरिकांना उपलब्धतेनुसार आठवड्यातून एकदा दोनदा लसीकरण होत आहे. दररोज सुमारे १३० कोरोना चाचण्या या केंद्रात करण्यात येत आहे, अशी माहिती वैद्यकीय अधिकारी डॉ. आदित्य गुजर यांनी दिली.