पेट्री : सातारा शहराच्या पश्चिमेस एकीव-कुसुंबीमुरा- चिकणवाडी रस्त्यावरील गतिरोधकांना पांढरे पट्टे नसल्याने रात्रीच्यावेळी अंदाज न आल्यास अपघात होऊ नये म्हणून शिवक्रांती हिंदवी सेना महाराष्ट्र राज्य यांच्यावतीने निरपेक्ष भावनेतून या आठ ते दहा किलोमीटर परिसरातील गतिरोधकांना पांढरे पट्टे मारण्यात आले. त्यांच्या या सामाजिक कार्याबद्दल सर्व स्तरातून कौतुक होत आहे.
पारंबे फाट्यापासून उजवीकडे एकीव-कुसुंबीमुरा-चिकणवाडी या मार्गावर मागील काही वर्षांपूर्वी डांबरीकरण झाले आहे. दरम्यान, या मार्गावर असणाऱ्या गतिरोधकांचा अंदाज यावा व अपघात टळावा, यासाठी शिवक्रांती हिंदवी सेनेकडून एकीव येथे तीन ठिकाणी, मोळेश्वर येथे दोन ठिकाणी, कुसुंबीमुरा येथे सहा ठिकाणी, तर चिकणवाडी येथे तीन ठिकाणी पांढरे पट्टे मारून रंगकाम करण्यात येत आहे. यामुळे भरधाव वेगात वाहन चालवणारे तसेच रात्रीच्यावेळी गतिरोधकांचा अंदाज न येता होणारा अपघात टळण्यास मदत होत आहे. तसेच धोकादायक वळणावरील रस्त्यावर देखील पांढऱ्या पट्ट्यात रंगकाम केले जात आहे.
गतिरोधकावरील पांढरे पट्टे, धोकादायक वळणावर दिशादर्शक खुणा, सूचना फलकांचा अभाव यामुळे यापूर्वी अनेकदा छोट्या-मोठ्या अपघाताच्या घटना घडल्या आहेत. यापुढे धोकादायक वळणावर सूचना फलक लावण्याचे काम करणार असल्याचे शिवक्रांती हिंदवी सेनेकडून सांगण्यात आले. दरम्यान, संस्थापक-अध्यक्ष स्वप्नील धनावडे, खजिनदार सुधीर कांबळे, जावळी तालुकाध्यक्ष शिवाजी गोरे, नवनाथ कोकरे, सुमित कांबळे, अनिकेत जाधव, महेश कोकरे, जगन्नाथ शिंदे, संतोष गोरे, संकेत कोकरे, अंकुश कोकरे, समीर कोकरे, सूरज कोकरे यांनी या सामाजिक उपक्रमात सहभाग घेतला. शिवक्रांती हिंदवी सेनेमार्फत राबवित असलेल्या समाजहितोपयोगी उपक्रमाचे कौतुक होत असून, ग्रामस्थांनी समाधान व्यक्त केले.
(कोट)
या मार्गावरील गतिरोधकांना पांढरे पट्टे, धोकादायक वळणावर दिशादर्शक खुणा, सूचना फलक नसल्याने छोट्या-मोठ्या अपघातांचे प्रमाण वाढत होते. दरम्यान, अपघाताचा अनर्थ टळला जावा, यासाठी नि:स्वार्थ भावनेतून हा सामाजिक उपक्रम हाती घेण्यात आला. यासाठी ग्रामस्थांचे सहकार्य मिळाले.
- शिवाजी गोरे, जावळी तालुकाध्यक्ष
फोटो २४पेट्री
शिवक्रांती हिंदवी सेनेच्या सदस्यांनी एकीव-कुसुंबीमुरा-चिकणवाडी रस्त्यावरील गतिरोधकांना पांढरे पट्टे मारण्यात आले.