सातारा नगरपालिकेची आज अंदाजपत्रकीय सभा

सातारा : सातारा पालिकेची अंदाजपत्रकीय सभा शुक्रवार, दि. २६ रोजी सकाळी ११ वाजता होणार आहे. या सभेत उपनगराध्यक्ष मनोज शेंडे ३०७ कोटी ४७ लाख ६६ हजार ४२४ रुपयांचे अंदाजपत्रक ऑनलाईन जाहीर करणार आहेत.

हद्दवाढीमुळे पालिकेचे अंदाजपत्रक यंदा ३०७ कोटींवर गेले आहे. या अंदाजपत्रकाच्या पुस्तकातून गोषवारा पत्रकच गायब असल्याने नक्की किती कोटींचे अंदाजपत्रक यावरून नगरसेवकांत संभ्रमावस्था निर्माण झाली होती. या विषयावर सभेत खडाजंगी होण्याची चिन्हे आहेत.

दरम्यान, सभेच्या पूर्वी सत्ताधारी सातारा विकास आघाडी व विरोधी नगर विकास आघाडी यांच्या स्वतंत्र बैठका गुरुवारी पालिकेत झाल्या. साविआच्या बैठकीत अंदाजपत्रकाच्या रणनीतीवर त्रोटकच चर्चा झाली. तर नगरविकास आघाडीने व्यापारी गाळ्यांच्या संपलेल्या मुदती, लांबलेली चतुर्थ वार्षिक पाहणी, कर वसुली, महाराष्ट्र जीवन प्राधिकरणाच्या प्रलंबित थकबाकीचा राहिलेला अनुल्लेख या विषयावरून सत्ताधाऱ्यांना घेरण्याची रणनीती आखली असल्याची चर्चा आहे.

पालिकेकडून उत्पन्नवाढीसाठी कोणतेच प्रयत्न होताना दिसत नाही. मुदत संपलेले गाळे ताब्यात घेतले नाहीत. करंजेतील भूखंडांची परिस्थितीही तशीच आहे. त्यामुळे पालिकेचा कोट्यवधींचा महसूल बुडत आहे. करवसुलीचे उद्दिष्ट यंदा पूर्ण होईल की नाही, हे प्रश्नचिन्हच आहे. यासह विविध विषयांवरून सभेत वादंग होण्याची चिन्हे आहेत.

फोटो : पालिकेचा फोटो वापरणे