Udayanraje Bhosale | सातारा : सातारा लोकसभा निवडणुकीत पुन्हा एकदा उदयनराजे भोसले भाजपकडून आपले नशीब आजमवत आहेत. यावेळी त्यांच्यासमोर महाविकास आघाडीच्या शशिकांत शिंदे यांचे आव्हान आहे. कधीकाळी एकमेकांसाठी मत मागणारे शरद पवारांचे हे दोन्ही शिलेदार आता लोकसभेला एकमेकांविरोधात लढत आहेत. पण, लोकसभेला प्रथमच 'घड्याळा'ची कमी असल्याने याचा फटका आणि फायदा कोणाला होतो हे ४ जून रोजीच स्पष्ट होईल. यावेळी सातऱ्यात तुतारी विरूद्ध कमळ अशी थेट लढत होणार आहे. या पार्श्वभूमीवर साताऱ्यातील महायुतीचे उमेदवार उदयनराजे भोसले यांनी 'लोकमत' व्हिडीओचे संपादक आशिष जाधव यांना दिलेल्या विशेष मुलाखतीत विविध मुद्द्यांवर भाष्य केले. यावेळी त्यांनी सातारच्या विकासाचा पाढा वाचताना पंतप्रधान नरेंद्र मोदी यांचे विशेष कौतुक केले.
उदयनराजे भोसले म्हणाले की, उमेदवारीबाबत माझ्या मनात शंका नव्हती. वेळ लागला असला तरी एकनाथ शिंदे आणि अजित पवार यांच्यासह इतर मित्रपक्षांसोबतच्या चर्चेत वेळ जातच असतो. आम्ही नुकताच संकल्पनामा जाहीर केला आहे. १० हजार कोटी रूपयांची कामे माझ्या माध्यमातून झाली आहेत. तसेच खासदार झाल्यावर काय रोडमॅप असेल यावर त्यांनी सांगितले की, नमो गंगाचे जसे शुद्धीकरण झाले त्याच पद्धतीने नमो कृष्णाचे शुद्धीकरण झाले पाहिजे. पाणी दूषित होऊन काही होऊ नये आणि लोकांचे आरोग्य चांगले राहावे यासाठी प्रयत्न करणार आहे.
दरम्यान, उदयनराजेंच्या प्रचारासाठी पंतप्रधान नरेंद्र मोदी कऱ्हाड येथे प्रचारसभा घेणार आहेत. मोदींनी छत्रपती शिवाजी महाराजांचे विचार आत्मसात केले आहेत. विकासाच्या माध्यमातून ते आचरणात आणले आहेत. केंद्रात आणि राज्यात चांगले काम होत आहे. मोदींचे माझ्यावरच नाही तर सर्वांवर लक्ष असल्याचे उदयनराजेंनी सांगितले. तुमच्यासमोर तुतारी वाजेल का यावर उदयनराजे म्हणाले, "आमच्या इथे आधीपासूनच तुतारी वाजत आली आहे, आजही लग्नकार्यात तुतारी वाजवली जाते. पण, निवडणुकीत चित्र काहीसे वेगळे आहे. मविआच्या उमेदवाराने एवढे घोटाळे करूनही तुतारी वाजणार का असे विचारले जाते. ती तुतारी कशी वाजेल? वाजणारच नाही. ते आपले स्वत:चे घोटाळे लपवण्यासाठी इतरांवर आरोप करत आहेत. हे त्यांचे ब्रीदवाक्यच आहे."
कॉलरचा किस्सा
तसेच शरद पवार कॉलर उडवत आहेत, ते माझी स्टाईल करून मी चांगले काम करत असल्याचे सांगत आहेत. ते कॉलर उडवून याचे संकेत देत आहेत. त्यांना देखील माहिती आहे की, आपल्या पक्षाने चुकीचा उमेदवार दिलाय. मी मित्र मंडळीसोबत बसलो असताना कॉलर उडवण्याचा किस्सा घडला. रविवारचा दिवस होता बॉलिवूड आणि हॉलिवूडबद्दल गप्पा रंगल्या होत्या. मग राजकारणाचा विषय निघाला तेव्हा पॉलिटिक्सचा 'पॉलिवूड' अशी चर्चा झाली. तेव्हा मी बोललो की पॉलिटिक्स म्हणजे पॉलिवूड... फरक फक्त एवढाच की तिकडे रिटेक घेता येतो इथे नाही. एकतर इन नाही तर आऊट असे इथे असते. राज्याचे पॉलिवूड झालंय असे मी म्हणत नाही. पण, काही लोकप्रतिनिधी लोकांकडे दुर्लक्ष करतात, घोटाळे करतात. कुणी काय कमावले हे मला माहिती नाही पण मी लोकांचा विश्वास कमावला असून, यात मी समाधानी आहे, असेही उदयनराजेंनी नमूद केले.
ते आणखी म्हणाले की, सात तारखेला मतदान होत आहे ही केवळ औपचारिकता आहे. आताच निकाल लागल्यात जमा आहे. त्यानंतर आमदारकीची निवडणूक होईल. सातारा लोकसभा मतदारसंघातील सर्व सहा विधानसभेच्या जागा महायुती जिंकेल असा मला विश्वास आहे. मागील वेळी मताचे विभाजन झाल्यामुळे काही जागा इकडे तिकडे झाल्या पण यावेळी महायुतीचा विजय निश्चित आहे.
उदयनराजेंनी सांगितली चूक
२०१९ च्या लोकसभा निवडणुकीत उदयनराजे राष्ट्रवादीच्या तिकिटावर खासदार झाले. पण अवघ्या सहा महिन्यात त्यांनी भाजपमध्ये प्रवेश करत राजीनामा दिला. मग विधानसभा निवडणुकीसोबत लोकसभेची पोटनिवडणूक झाली अन् राजेंना पराभव पत्करावा लागला. भाजपच्या कमळ चिन्हावर लढलेल्या उदयनराजेंना राष्ट्रवादीच्या श्रीनिवास पाटील यांनी पराभूत केले. याबद्दल बोलताना राजेंनी आपल्या चुकीची कबुली दिली आहे. ते म्हणाले की, मी राजीनामा देणार होतो हे निश्चित होते. मात्र, मी माझ्या लोकसभा मतदारसंघातील विधानसभा क्षेत्रातील ज्येष्ठ सहकाऱ्यांना विचारात न घेता निर्णय घेतला. तसे केले नसते तर पोटनिवडणुकीत देखील विजय झाला असता. पण, मी देखील एक माणूस आहे आणि माझ्याकडून ती एक मोठी चूक झाली. पण यातून मी खूप काही शिकलो आहे.