संतोषला पाहिलं की लोक म्हणायचे ‘आला काळा नाग’!

कर्मचारी लागले बोलू : शासकीय कार्यालयांमध्येही निर्माण केली होती दहशत

मुराद पटेल -- शिरवळ --पापाचा घडा भरला की, सगळं बाहेर पडतं. वाईच्या संतोष पोळच्या बाबतीतही हेच घडलंय. लाचलुचपतची भीती दाखवून शासकीय कर्मचाऱ्यांमध्ये दहशत निर्माण करणारा संतोषला पाहिलं की, ‘आला काळा नाग’ अशी प्रतिक्रिया बाहेर पडत होती. शासकीय कर्मचारी आता त्यांच्या भावना बोलून दाखवू लागले आहेत.
संतोष पोळचे रोज नवे कारनामे उघडकीस येत असतानाच दहशतीच्या किश्शांना हॉटेल, कार्यालयांमधून वाचा फुटत आहे.
मंगल जेधे खूनप्रकरणी पोळ याच्यासह ज्योती मांढरे हिच्या मुसक्या पोलिसांनी आवळल्यानंतर अनेक धक्कादायक खुलासे तपासामध्ये उघडकीस येऊ लागल्या आहेत. संतोषने सहा खुनांच्या गुन्ह्याची कबुली दिल्यानंतर खळबळ उडाली होती.
या प्रकरणानंतर संतोषच्या अनेक कारनाम्यांचे व दहशतीचे प्रकरण उघडकीस येऊ लागले आहेत. संतोष पोळ सहकाऱ्याचा वापर करून पोलिस अधिकारी, कर्मचाऱ्यांपासून ते विविध विभागांतील कर्मचाऱ्यांविरोधात खोटे गुन्हे दाखल करत होता. यासाठी तो कोणत्याही स्तराला जात होता. त्यामुळे गुन्हा दाखल न करण्यासाठी बाहेर आर्थिक तडजोडी करण्याऐवढी दहशत संतोषने तयार केली होती.
त्यामुळेच तो एखाद्या शासकीय कार्यालयात आला तर ‘आला विषारी नाग,’ अशी प्रतिक्रिया उपस्थित अधिकारी व कर्मचारी वगार्तून उमटत होत्या. तो जेवढा वेळ कार्यालयामध्ये असेल तेवढा वेळ शासकीय अधिकारी व कर्मचारी दहशतीखाली व तणावाखाली वावरत असत.