रेठरे तंटामुक्तीच्या अध्यक्षपदी मोहिते

कऱ्हाड : रेठरे बुद्रुक (ता. कऱ्हाड) येथील महात्मा गांधी तंटामुक्त गाव समितीच्या अध्यक्षपदी दत्तात्रय ऊर्फ आबा मोहिते यांची निवड करण्यात आली. नुकत्याच झालेल्या ग्रामसभेत ही निवड पार पडली. सरपंच सुवर्णा कापूरकर अध्यक्षस्थानी होत्या. यावेळी बिपिन ऊर्फ सनी मोहिते यांनी अध्यक्ष निवड ग्रामस्थांच्या सहमतीने व्हावी, असे नमूद करून याबाबत मतदान घेण्याची सूचना मांडली. धनंजय मोहिते यांनी दत्तात्रय मोहिते व विक्रमसिंह मोहिते हे दोघेही समाजकार्यात अग्रेसर असल्याचे सांगून उपस्थित ग्रामस्थांना हात उंचावून मतदान करण्याचे आवाहन केले. त्यानंतर दत्तात्रय मोहिते यांच्या बाजूने हात उंचावून सर्वानुमते मतदान झाले. ग्रामविकास अधिकारी डी. एम. करचे यांनी दत्तात्रय मोहिते यांच्या बाजूने ग्रामस्थांचा सर्वानुमते पाठिंबा असल्याने त्यांच्या निवडीची घोषणा केली.

येरवळेत तंटामुक्ती अध्यक्ष निवड बिनविरोध

कऱ्हाड : येरवळे (ता. कऱ्हाड) येथील ग्रामसभेत तंटामुक्त समितीच्या अध्यक्षपदी सेवानिवृत्त पोलीस निरीक्षक के. पी. यादव यांची बिनविरोध निवड झाली. निवडीनंतर उपस्थितांच्या हस्ते त्यांचा सत्कार करण्यात आला. नरेंद्र थोरात यांच्या अध्यक्षतेखाली ग्रामसभा झाली. सरपंच गीतांजली यादव, उपसरपंच अशोक यादव, ग्रामपंचायत सदस्य कविता यादव, मंगल कुंभार, संजय यादव, राहुल राऊत, राजेंद्र वाघमारे, तानाजीराव यादव, विकास यादव, महेश यादव, संदीप लोकरे, अण्णासाहेब यादव यांनी चर्चेत भाग घेतला. ग्रामविकास अधिकारी राजेंद्र बोडके यांनी मागील सभेचे प्रोसिडिंग वाचन केले. राष्ट्रीय पेयजल योजनेसह अन्य विविध विकासात्मक मुद्द्यांवर ग्रामसभेत चर्चा झाली. आनंदराव लोकरे यांनी आभार मानले.

बापूराव पाटील यांची उपाध्यक्षपदी निवड

कऱ्हाड : उंडाळे (ता. कऱ्हाड) ग्रामपंचायतीचे उपसरपंच बापूराव पाटील यांची सरपंच परिषदेच्या कऱ्हाड दक्षिण उपाध्यक्षपदी निवड झाली. परिषदेचे मार्गदर्शक शंकरराव खापे, पश्चिम महाराष्ट्र उपाध्यक्ष सतीश इंगवले यांच्याहस्ते त्यांना पत्र प्रदान करण्यात आले. यावेळी जावेद मुल्ला, उदय पाटील, ग्रामविकास अधिकारी शरद चव्हाण उपस्थित होते. महाराष्ट्र प्रदेश काँग्रेसचे सरचिटणीस ॲड. उदयसिंह पाटील, अधिकराव पाटील, धनाजी पाटील, ग्रामपंचायत सदस्य गणेश पाटील, दादासाहेब पाटील, अजित कदम, माधव अंबवडे, प्रमोद पाटील, अमोल पाटील, मयुर पाटील, सत्यजित पाटील यांच्याहस्ते त्यांचा सत्कार करण्यात आला.

एसएमएसमध्ये विद्यार्थी बनले वर्गशिक्षक

कऱ्हाड : येथील एसएमएस इंग्रजी माध्यमाच्या प्राथमिक विभागाने अनोखा उपक्रम राबविला. ऑनलाइनद्वारे इयत्ता तिसरी व चौथीच्या विद्यार्थ्यांना वर्गशिक्षक म्हणून ज्ञानदान करण्याची संधी देण्यात आली. सर्व शिक्षकांच्या सहमतीने कार्यक्रमाचे नियोजन करण्यात आले. शाळेच्या मुख्याध्यापिका वाळिंबे यांनी मार्गदर्शन केले. ऑनलाइन पद्धतीने आयोजित करण्यात आलेल्या या उपक्रमात विद्यार्थी, पालक आणि शिक्षक सहभागी झाले होते.