वाढला टक्का..कुणाला धक्का?

कापीलमध्ये मारामारी : अपवाद वगळता सर्वत्र शांततेत मतदान

कऱ्हाड : राज्याचे लक्ष लागून राहिलेल्या कऱ्हाड दक्षिण विधानसभा मतदारसंघात सरासरी ७२.६४ टक्के मतदान झाले. टक्का वाढल्यने कुणाला धक्का बसणार, याची चर्चा आता सुरू झाली आहे. मतदान केंद्रांवर सकाळपासून मतदारांच्या रांगा लागल्या होत्या. दुपारी उन्हाच्या तडाख्यामुळे काही केंद्रांवर शुकशुकाट जाणवला. मात्र, सायंकाळी पुन्हा उत्स्फूर्तपणे मतदान झाले. कापील येथे दोन गटांतील कार्यकर्त्यांमध्ये झालेली मारामारी वगळता मतदारसंघात कोणताही अनुचित प्रकार घडला नाही. संवेदनशील असणाऱ्या काले गावात ७५ टक्के, विंगमध्ये ७९ टक्के, वडगाव हवेलीत ८२, मलकापुरात सुमारे ७८ टक्के, तर कऱ्हाड शहरात ७० टक्के मतदान झाले. दक्षिणेतील अनेक गावे संवेदनशील असल्याने कडक पोलीस बंदोबस्त तैनात करण्यात आला होता.

पृथ्वीराज चव्हाणांची भेट
माजी मुख्यमंत्री पृथ्वीराज चव्हाण हे कऱ्हाड दक्षिणमधून काँग्रेसचे अधिकृत उमेदवार आहेत़ त्यांनी मतदान प्रक्रियेवर स्वत: लक्ष केंद्रित केले होते़ सकाळी कऱ्हाड येथील शाळा क्ऱ ३ मध्ये आपला मतदानाचा हक्क बजावला़ त्यानंतर शहरातील सर्व मतदान केंद्रांसह मलकापूर, आगाशिवनगर, चचेगाव, कोयनावसाहत, जखिणवाडी, नांदलापूर, वारुंजी, वहागाव, धोंडेवाडी, काले, कालेटेक, वाठार यासह मतदारसंघातील मतदान केंद्रांवर जाऊन मतदानाबाबत केंद्रप्रमुखांशी चर्चा केली़ यावेळी आमदार आनंदराव पाटील यांच्यासह कार्यकर्ते त्यांच्यासोबत होते.

पोलिंग एजंटांमध्ये बाचाबाची
मलकापूरात बुथ क्रमांक १६३ मध्ये मतदान सुरू झाल्यानंतर सकाळी ११ वाजण्याच्या सुमारास एका पक्षाच्या पोलींग एजंटने एका मतदारावर अक्षेप घेतला़ यावेळी विरोधी पक्षाच्या पोलींग एजंटाची संबंधित एजंटाशी बाचाबाची झाली़ केंद्रप्रमुखाने हस्तक्षेप करून त्या मतदाराचे ओळखपत्र व मतदार यादितील नाव ग्राह्य मानून संबंधीत मतदारास मतदानाचा हक्क बजावण्याची परवानगी दिली़

दोन आमदार आमने-सामने
काले येथे दुपारी साडेचार वाजण्याच्या सुमारास उमेदवार आमदार विलासराव पाटील-उंडाळकर मतदान केंद्रावर आले. त्यापाठोपाठ माजी मुख्यमंत्री पृथ्वीराज चव्हाण यांच्या प्रचारात आघाडीवर असणारे आमदार आनंदराव पाटील त्याठिकाणी आले. त्यामुळे दोन्ही गटांच्या कार्यकर्त्यांमध्ये चुळबुळ सुरू झाली. उंडाळकर लगेच निघून गेले; पण आनंदराव पाटील पृथ्वीराज चव्हाणांची वाट पाहत थांबले होते.

पाटीलवाडीत पोलिंग एजंटांमध्ये वाद
पाटीलवाडी, ता. कऱ्हाड येथे मतदान केंद्र क्र. ४६ वर एका पक्षाच्या एजंटाला दुसऱ्या पक्षाच्या कार्यकर्त्यांनी दमबाजी केल्याची घटना घडली. पोलिसांनी हस्तक्षेप करीत हे प्रकरण हाताळले. या प्रकारामुळे संबंधित ठिकाणी काहीकाळ तणाव निर्माण झाला होता.

म्हासोली व येवती येथे मतदान केंद्रांत निवडणुकीशी काहीही संबंध नसणाऱ्या दोन तरुणांनी विनापरवाना प्रवेश केला. कार्यकर्त्यांना संशय आल्याने त्यांनी याबाबतची माहिती पोलिसांना दिली. पोलिसांनी तातडीने त्याठिकाणी जाऊन संबंधित दोन्ही युवकांना ताब्यात घेतले. पोलीस उपनिरीक्षक रमेश गर्जे यांनी संबंधित युवकांना ताब्यात घेतले.

लक्ष्मीनगरमध्ये दहा मिनिटे
प्रक्रिया बंद
लक्ष्मीनगर-मलकापूर येथील बुथ क्रमांक १०७ वर सकाळी ११.३० वाजेपर्यंत ३०८ मतदारांनी मतदानाचा हक्क बजावला. त्यानंतर यंत्राचे एक बटन दाबले जात नसल्याची तक्रार मतदाराने केली़ केंद्रप्रमुखांनी यंत्राची तपसणी करून झोनल आॅफिसर यू. एऩ देसाई यांना माहिती दिली़ त्यानंतर दहाच मिनिटांतच नवीन मशीन देण्यात आले.