गरिबांची ‘उज्ज्वला’ गॅसवरून पुन्हा चुलीवर !

सातारा : स्वयंपाकाचा गॅस जवळपास ८०० रुपयांवर जाऊन पोहोचला आहे. पंतप्रधान उज्ज्वला योजनेंतर्गत गरीब कुटुंबांना मोफत गॅस कनेक्शन देण्यात आले. ही कुटुंबे आता गॅस महागल्यानंतर पुन्हा चुलीकडे वळू लागली आहेत. न परवडणारा गॅस घेण्यापेक्षा शेतातील उसाचे बुडके अन्‌ ओढ्या, नदीला पडलेल्या काट्या आणून स्वयंपाक शिजविण्यास या महिलांनी सुरुवात केलेली आहे.

केंद्र शासनाने मोठी जाहिरातबाजी करून गोरगरीब महिलांना उज्ज्वला गॅस योजनेत घेतले. ज्या महिला चुलीपुढे बसून स्वयंपाक करत होत्या, त्यांच्या डोळ्यांतील पाणी शासनाला बघवले नव्हते. मात्र आता गॅसच्या दरवाढीमुळे महिलांच्या डोळ्यांत येणारे पाणी दिसत नाही का? अशी परिस्थिती आहे.

प्रत्येक घरात गॅस आला. त्यामुळे रेशनवर मिळणारे रॉकेलदेखील बंद केले. यापूर्वी महिला चूल, स्टोव्हचा वापर स्वयंपाकासाठी करत होत्या. मात्र, रॉकेलच मिळत नसल्याने स्टोव्ह कालबाह्य झाले, तर चुलीही ठिकठिकाणी बंद झाल्या. चुलीचा धूर दिसेनासा झाला. महिलांना मोफत गॅस कनेक्षन मोफत देण्यात आल्याने सुरुवातीला त्यांना दिलासा मिळाला होता. परंतु आताच्या घडीला घरातल्या गॅसचं ओझं गरिबांना परवडेना झालं आहे.

गॅसची सबसिडी देखील बंद केली गेल्याने गरीब कुटुंबांची वाताहत सुरु झालेली आहे. गॅसपेक्षा चूल बरी, असे म्हणत अनेकांनी पुन्हा चुली पेटवल्या आहेत. गोरगरीब लोक मोलमजुरी करून उदरनिर्वाह करत असतात, त्यांना गॅस घेणे परवडत नाही, असे या योजनेतील लाभार्थ्यांचे म्हणणे आहे.

लोगो - रियालिटी चेक

१) पंतप्रधान उज्ज्वला योजनेचे जिल्ह्यातील लाभार्थी १ लाख २३ हजार ४४७

२) गॅस आवाक्याबाहेर

जानेवारी २०२० : ७०७ रुपये

जुलै - २०२० : ५९९ रुपये

जानेवारी - २०२१ : ६९९ रुपये

फेब्रुवारी - २०२१ : ७९९ रुपये

(घरगुती गॅस सिलिंडरचे दर)

प्रतिक्रिया (उज्ज्वला योजनेंतर्गत गॅस घेतलेल्या पाच गृहिणींच्या प्रतिक्रिया)

दररोज मोलमजुरी करावी तेव्हा कुठे दोनवेळच्या खाण्याची तजवीज होतेय. पंतप्रधान योजनेतून गॅस मिळाला, तेव्हा काहीसे समाधान वाटले; परंतु दिवसेंदिवस गॅसच्या किमतीमध्ये भरमसाट वाढ होत आहे.

- रुक्मिणी गायकवाड, अंगापूर

आधी आम्ही चुलीवर स्वयंपाक करत होतो. शेतातून काम करून येत असतानाच जळणाचं ओझं घेऊन येत होतो. या जळणात दोन दिवसांचा स्वयंपाक व्हायचा, अंघोळीचं पाणीही तापायचं. हे जळण शेतात, ओढ्याकडेला कुठेही उपलब्ध होत होतं.

- सावित्री पवार

गॅस सिलिंडरचा दर आवाक्याबाहेर गेलेला आहे. नाईलाजाने गॅस बंद ठेवून पुन्हा आपली चूलच पेटवलेली बरी, म्हणत जळाण काटूक गोळा करून खाण्याची तयारी करावी लागत आहे.

- लक्ष्मी जाधव

सरकारनं मोफत गॅस देऊन आमच्या डोळ्यांतील पाणी थांबवले असं वाटत होतं. आता मात्र गॅस दर आमच्या डोळ्यांत पाणी आणत आहे. हे पाणी सरकारला दिसत नाही का? सरकारनं परवडणाऱ्या दरात घरगुती गॅस उपलब्ध करावा.

- सुनंदा कदम

गॅस दरवाढीने हातावर पोट असणाऱ्या आमच्यासारख्या मोलमजुरी करणाऱ्या लोकांना फटका बसतोय. केंद्र शासनाने लवकरात लवकर निर्णय घेऊन गॅसचे दर सर्वसामान्यांना परवडतील एवढे करावेत, अन्यथा रेशनवर रॉकेल पुरवठा पुन्हा सुरू करावा.

- समृध्दी साळुंखे

गरिबाच्या डोळ्यांतील पाणी दिसत नाही का?

बीपीएल कार्डधारक कुटुंबाचे महिन्याचे साधारण उत्पन्न २ हजारांच्या आतच असते. त्याचा एकूण खर्च आणि गॅसचा वाढलेला खर्च याचा ताळमेळ बसविणे आता कठीण जात आहे. २ हजारांतील ८०० रुपये जर गॅस खरेदीसाठी गेले, तर उरलेल्या पैशांत कुटुंबाचा उदरनिर्वाह करायचा कसा? हा त्यांच्यापुढे यक्षप्रश्न आहे. गरिबांच्या डोळ्यांतील पाणी सरकारला दिसत नाही का? असा सवाल या महिला विचारत आहेत.

(दोन कॉलम)

फोटो ओळ : सातारा शहरातील ही महिला गॅसचा दर आवाक्याबाहेर गेला असल्याने चुलीवर स्वयंपाक करत आहे. (छाया : जावेद खान)

25जावेद15, 16